قارچكى كوێستانه‌كان كێبڕكێى قارچكى ناوخۆ ده‌كات

هەواڵ / ڕاپۆرت :: 08/12/2018‌ :: 1939‌ جار بینراوە

دواڕۆژ، ڕاپۆرت، محەمەد مستەفا
قارچک یا کارگ، روه‌كێكى وەرزییە و لە سەرەتای وەرزی پایز تا ناوەڕاستی وەرزی بەهار گەشەدەکات، کەش و هەوای هەرێم گونجاوە بۆ گەشەکردنی قارچک و لە ئێستاشدا دەیان جۆر لە قارچک لە بازاڕەکانی هەرێم بوونی هەیە و بەگوێرەی بەدواداچونەکانی دواڕۆژ، قارچکی کوێستانەکان زۆرترین خواستی لەسەرەو بەگشتیش نرخی قارچک لە بازاڕەکانی هەرێم لە نێوان 3 بۆ 25 هەزار دینارە.


قارچکی کوێستان زۆرترین خواستی هاوڵاتیانی لەسەرە و نرخەکەی گرانە 
عەلی ئیسماعیل، کاسبکارێکی بازاڕی ڕانیەیە و سەرقاڵی فڕۆشتنی بەرهەمی خۆماڵیەکانە و قارچک یەکێک بوو لە بەرهەمەکانی، دەربارەی نرخ و جۆرەکانی قارچک بە دواڕۆژی وت: "لە ئێستادا دەیان جۆر قارچک لە بازاڕەکان بوونیان هەیە کە بەشێکیان قارچکی کارگەکانی هەولێر و شارەزور و پێنجوێنن و بەشەکەی تری قارچکی خۆماڵیە کە خەڵکی لە شاخ و پێدەشتەکانەوە دەیهێنن بۆ بازاڕەکان و دەیفڕۆشن".

ئەو کاسبکارە باسی لەوەشکرد: باشترین جۆری قارچک کە خواستی زۆری لەسەرە قارچکی کوێستانەکانە و نرخەکەی لە نێوان 15 بۆ 25 هەزار دیناری عێراقیدایەو قارچکی کارگەکانی هەرێمیش بەگشتی نرخەکەیان لەنێوان 3 بۆ 5 هەزار دیناردایە.

هاووڵاتیەک دەڵێت: "بەلای منەوە قارچکی برژاو لە گۆشتی بەرخ خۆشترە".
ئەحمەد حوسێن، هاووڵاتیەکی قەزای رانیە لە بازاڕی قەزاکەدا سەرقاڵی دۆزینەوەی قارچکی کوێستانی بوو، بۆ دواڕۆژ وتی: "دەگەڕێم تا قارچکی کوێستانەکانی قەندیلم دەستکەوێت، چونکە خواردنی قارچکی برژاوی کوێستانی قەندیل لە خواردنی گۆشتی بەرخ خۆشترە".

شارەزایەکی کشتوکاڵی: "پێویستە هاوڵاتیان ئاگاداری جۆرەکانی قارچک بن".
ساڵح حسێن، شارەزایەکی بواری کشتوکاڵە، سەبارەت بە ناسینەوەی جۆری قارچکی سودبەخش و ژەهراوی بە دواڕۆژی ڕایگەیاند: لە باشوری کوردستان باشترین جۆرە سروشتییەکانی قارچک گەشە دەکەن وەک قارچکی کوێستانەکان و قارچکی داربەڕو و کالیپیتۆس و قۆپچەی و چەندانی تر، کە ئەمانە قارچکی سودبەخشن و گونجاون بۆ خواردن ئەمە جگە لەوەی قارچک لە ڕووی تەندروستییەوە سودێکی زۆری هەیە لە بواری دابینکردنی پڕۆتین و وزە بۆ لەشی مرۆڤ.

ساڵح حسێن ڕوونیشیکردەوە: هاووڵاتیان پێویستە دووربکەونەوە لەو قارچەکانەی کە بەشێوەی تاک لە ناوچەیەکی فراوان گەشەی کردووە، چونکە بەگشتی قارچکی شیاو بۆ خواردن لەناوچە گونجاوەکان بەشێوەی کۆمەڵ گەشە دەکەن، هاوکات دووربکەونەوە لە قارچکی خاڵدار بە جۆرێک زۆرێک لە قارچکی ژەهراوی کۆمەڵێک خاڵی ڕەش یاخود سور لەسەرچەترەکەی بوونی هەیە.

 جه‌ختیشیكرده‌وه‌: بەگشتی جیاکردنەوەی قارچکی سەلامەت و ژەهراوی دەکەوێتەوە سەر ئەزموونی کەسەکان، بۆیە دەبێت هاووڵاتیان لەکاتی نەبوونی زانیاری لەسەر جۆری قارچک، ئەوا دەبێت دووربکەوەوە لە خواردنی، چونکە قارچکی ژەهراوی کاریگەری زۆر خراپ لەسەر تەندروستیان جێدەهێڵێت".

ماوەی بەسەرچوونی بەرهەمی قارچک تەنیا هەفتەیەکە، بۆیە هاوردەی هەرێم ناکرێت.
جەوهەر ڕەسوڵ، بەڕێوبەری گومرگی ڕاپەڕین بە دواڕۆژی راگەیاند: ئەو قارچکەی لە بازاڕەکانی هەرێم هەیە بەرهەمی خۆڕسک و کارگەکانی ناوخۆی هەرێمی کوردستانەو لە سنوری ئێرانەوە قارچک هاوردە ناکرێت، بەهۆی ئەوەی ماوەی بەسەرچوونی قارچک تەنیا یەک هەفتەیه، ئەمەش وایکردووە بازرگانان ترسیان هەبێت لە سەرفنەبوونی بەرهەمەکە، بۆیە بازرگانان قارچ هاوردەی هەرێم ناکەن.

پێداچوونه‌وه‌: سیروان محه‌مه‌د



created by Avesta Group and powered by Microsoft Azure