ئەو فەرماندە تورکمانەی هەڕەشەکانی بڵاوکرایەوە قسە بۆ دواڕۆژ دەکات

هەواڵ / کوردستان :: 23/11/2018‌ :: 1258‌ جار بینراوە

دواڕۆژ، عیماد جەباری
لەچەند رۆژی رابردوودا گرتەیەکی ڤیدیۆیی لەتۆڕە کۆمەڵایەتییەکان بڵاوکرایەوە و تێیدا جێگری فەرماندەی لیوای 16ی حەشدی تورکمانی کۆمەڵێک هەڕەشە لە پارێزگاری کەرکوک و بەرپرسە عەرەبەکانی شارەکە دەکات و بەگەندەڵ ناوزەندیان دەکات.


غەریب تازەلی جێگری لیوای 16ی حەشدی تورکمانی و ئەو کەسەی کە لە ڤیدیۆکەدا هەڕەشەدەکات، بەدواڕۆژی وت: "لەدوای پێدانی ئیدارەی کەرکوک بە راکان جبوری تەنیا کاری بۆ ناوچەکانی خۆیان کردووە و ناوچەکانی تورکمان و کوردیشی لەڕووی خزمەتگوزارییەوە فەرامۆشکردوە".

رونیشیکردۆتەوە: لەکاتێکدا لەنیوەی ساڵ نزیک دەبینەوە، کەچی هێشتا ئامادەیی تازەخورماتوو مامۆستای بۆ دابین نەکراوە.

غەریب تازەلی دەشڵێت: "71 ملیار دینار هاتۆتە نێو کەرکوکەوە، بەڵام هیچ پڕۆژەیەک لەکەرکوکدا نەبینرا جگە لەحەویجە زیاتر، لەکاتێکدا تازەخورماتوو بەدرێژایی چوار ساڵ لەلایەن داعشەوە بۆردومانکراوە و خەڵک بۆتە قوربانی".

فەرماندەکەی حەشدی تورکمان ئەوەشی وت: "بۆ چارەسەرکردنی کێشەکانمان مەجید عزەت ئەندامی لیژنەی پەروەردەی ئەنجومەنی پارێزگا سەردانی پەروەردەی کردووە، بەڵام بەڕێوەبەری پەروەردە ئامادەنەبووە پێشوازی لێبکات، ئێمە ئاگادارین دامەزراندنیش کراوەتەوە و دەیانەوێت بەتەنیا خەڵکی حەویجە دابمەزرێنن، پێشتریش پارەی رێکخراوەکان بۆ ناوچە زیانلێکەوتەکان لەنێو کەسوکارەکەی پارێزگاردا دزراوە".

هۆکاری هەڕەشەکانیشی بۆ ئەوە گەڕاندەوە کە چیتر ناتوانن لەبەرامبەر کارەکانی ئیدارەی کەرکوک بێ دەنگبن و تاوەکو رۆژی یەکشەممەیش مۆڵەتیانداوە بۆ جێبەجێکردنی داواکاریەکانیان بەپێچەوانەوە قسەی دیکەیان دەبێت.

غەریب تازەلی لەگرتە ڤیدیۆکەدا دەڵێت: "دوای تەواوبونی مۆڵەتەکە دەچمە پەروەردە و بەڕێوەبەرەکەی بە بۆینباخەکەی دەهێنمە دەرەوە"، هەرچەندە سورە لەسەر بەڵێنەکەی بەڵام هیوای خواست بەر لەکۆتایی مۆڵەتەکە کێشەکە چارەسەربکرێت".

پێداچوونەوە: ن.ر



created by Avesta Group and powered by Microsoft Azure