"پێویسته‌ هه‌رێم ئەو قەرزەی کە ماوە بیداتەوە بە جوتیاران"

هەواڵ / ئابوری :: 20/11/2018‌ :: 216‌ جار بینراوە

دواڕۆژ، هانا چۆمانی 
پارێزەرێکی خۆبەخشی جوتیاران رایدەگەیەنێت: هەرچەندە بڕیاربوو دووشەممە ۱۹ى تشرینی دووەمی ۲٠۱۸ دادگای رەسافە دوا بڕیاری کۆتایی لەسەر دۆسیەی پارەی گەنمی جوتیاران بدات و کەیسەکە یەکلا بکاتەوە ئەگەر هاتوو لایەنی بەرامبەر هیچ وەڵامێکیان نەبێت، بەڵام بەپێی لائیحەیەک کە ئاڕاستەی دادگا کراوە تیایدا هاتووە، پێویسته‌ هه‌رێم ئەو قەرزەی کە ماوە بیداتەوە بە جوتیاران.

رێبین شەمامکی، پارێزەری خۆبەخشی جوتیاران  بە دواڕۆژی راگەیاند: لە دانیشتنی  دادگای بەدائەی رەسافە، بڕیار بوو دادگاکە بڕیاری کۆتایی بدات لەسەر دۆسیەی پارەی گەنمی جوتیاران و کەیسەکە یەکلا بکاتەوە ئەگەر هاتوو لایەنی بەرامبەر هیچ وەڵامێکیان نەبێت لەسەر  ئەو بەڵگانەی ئێمە پێشکەشمان کردبوو، بەڵام بڕیاری کۆتایی نەدراو و بگرە خرایە ئەستۆیی هەرێمی کوردستان.

وتیشی: "لە دانیشتنەکەی دوێنێ دووشەممە لەدادگا نوێنەری وەزارەت ئامادەنەبوو، هەروەها نوێنەری کۆمپانیای دانەوێڵەش وەک وەڵامێک لائیحەیەکی پێنج خاڵیان پێشکەشی دادگا کرد، کە نوسراویکی ئەنجومەنی وەزیران بوو، وەک تەعلیمات لە بەرواری ۲۸ کانوونی دووەمی ۲٠۱۸ ، کە سەرۆک وەزیرانی ئەوکات حەیدەر عەبادی دەریکردبوو، پەیوەندی بە ١٧% بودجه‌وه‌ هەیە، هەرێم دەخاتە ژێر بار قەرزەکە".

دەشڵێت: "لە لائیحەکەدا هاتووە هەرێمی کوردستان پارەی گەنمی جوتیارانی زیاد لە بەشی خۆی وەرگرتووە، زیادەکەش بە نرخی بازرگانی پارەکە دەدرێت و ئەو پارە و قەرزەی جوتیارانی هەرێم کەدەمێنێت دەبێت هەرێمی کوردستان خۆی پارەی گەنمی جوتیاران بدات".

ئەوەشی خستەڕوو: "ئێمەش وەک پارێزەرانی خۆبەخش تا خاڵ بەخاڵی لائیحەکە بەتاڵ بکەینەوە کە هیچ بەڵگەیەکی یاسایی تیدا نیە، داوای کاتمان لە حاکم کرد بۆ ئەوەی بە لائیحەیەکی فه‌رمى وەڵامیان بداتەوە،  بۆیە لەکاتی دانیشتنەکەدا لائیحەیەکمان نووسی وەک وەڵامێک بۆ ئەوان و خستمانە ناو دۆسیەکە بۆ دانیشتنی داهاتوو".

رونیشیکردەوە: "بەهۆی لائیحەکەی ئێمە دادوەر بڕیاریدا رۆژی ۲۹ ئەم مانگە دانیشتێکی تر ئەنجامبدرێت و بڕیاری کۆتایی بدرێت".

پێداچوونه‌وه‌: سیروان محه‌مه‌د
دەقی لائیحەکە:

 



created by Avesta Group and powered by Microsoft Azure