دواڕۆژ زانیاری ورد لەسەر كۆمپانیاكانی فرۆشتنی چەكی كیمیایی بە سەدام ئاشكرا دەكات

هەواڵ / کوردستان :: 17/11/2018‌ :: 442‌ جار بینراوە

دواڕۆژ، عەلی حەمە سەعید
بۆ خستنەڕووی ئەنجامەكانی تۆماركردنی سكاڵا لەسەر ئەو كۆمپانیا و كەسایەتییانەی چەكی كیمیاییان بە حکومەتی سەدام حسێن فرۆشتووە، ئەمڕۆ تیمی پارێزەرانی نێودەوڵەتی لەگەڵ كەسوكاری شەهیدان كۆبوونەوە


جەمال جەلال، پارێزەر لە گروپی پارێزەرانی نێودەوڵەتی تایبەت بە دۆسیەی تۆماركردنی سكاڵا لەسەر كۆمپانیاكانی فرۆشتنی چەكی كیمیاویی بە دواڕۆژی ڕاگەیاند: بۆ گەیاندنی دوا ئەنجامەكان لەسەر تۆماركردنی سكاڵا لەسەر كۆمپانیاكانی فرۆشتنی چەكی كیمیاویی بە حکومەتی سەردەمی سەدام و ناچاركردنی ئەو كۆمپانیایانە بە قەرەبووكردنەوەی كەسوكاری شەهیدان، ئەمڕۆ لەگەڵ ئەو خێزانانە كۆبووینەوە كە سكاڵای یاساییان تۆماركردووە.

ئاماژەی بەوەشكرد، بەڵگەی ورد و تەواومان لەسەر نۆ كۆمپانیای ئەڵمانیا و هۆڵەندا و بریتانیا و فڕەنسا و لۆكسۆمبۆرگ، كۆكردوەتەوە و بانگهێشتی دادگاش بەو كۆمپانیایانە گەیشتووە تا لەدانیشتنی داهاتووی دادگاییكردنەكە یان خۆیان یاخود پارێزەرەكانیان ئامادەبن كە وابڕیارە لە 27/11/2018 لە دادگای بەرایی هەڵەبجە بەڕێوەبچێت.

ئەو پارێزەرە زانیاری وردتری بۆ دواڕۆژ ئاشكراكرد و ئەوەی خستەڕوو ئەو كۆمپانیایانەی چەكی كیمیاوییان بە ڕژێمی لەناوچووی بەعس فرۆشتووە بریتین لە كۆمپانیای (توو وی) و (كارڵ كۆڵ) و ( هێربەرگر)ی ئەڵمانی و (دیدیتریچ)ی فڕەنسی و (گروپ پرۆتێل) و (جەنراڵ مەریترین هۆڵدین) و (وێت)ی بریتانی و (مێڵ سپرینگ ئینتەرناشناڵ) ی هۆڵەندی و (لۆكسۆمبۆرگ)ی لۆكسۆمبۆرگی-ن.

بە مەبەستی بە سزاگەیاندنی ئەو كۆمپانیایانەی چەکی كیمیاوییان بەڕژێمی لەناوچووی بەعس فرۆشتووە، لە 12/3/2018 لەسەر داوای كەسوكاری شەهیدانی هەڵەبجە سكاڵای یاسایی لەسەر ئەو كۆمپانیا و كەسایەتییانە تۆماركرا و لە 25/7/2018 یەكەم دانیشتنی داگا بەڕێوەچوو، وابڕیاریشە لە 27/11/2018 دووم دانیشتنی دادگا لەسەر هەمان دۆسییە بەڕێوەبچێت.


كیمیابارانی ھەڵەبجە لە ١٦ی ئازاری ١٩٨٨ ڕوویدا لە كۆتایی ڕۆژەكانی جەنگی ئێران-عێراق، لەلایەن ڕژێمی بەعسی عێراقەوە كە شاری ھەڵەبجەی بە گازی كیمیایی كیمیاباران كرد.


زیاد لە ٥٠٠٠ ھاوڵاتی كوردی بێتاوانی پێكھاتوو لە ژن و مناڵ و گەنج شەھیدكران و ١٠٠٠٠یش برینداركران. 


ئاسەواری كیمیاباران بەسەر بریندارانی ھاوڵاتیانی ھەڵەبجەوە ماوە، پێشتریش گەورە بازرگانی چەكی كیمیایی، فرانس ڤان ئەنرات ڕاپێچی دادگا كرا و بە تاوانی جەنگ و كۆمەڵكوژی بەماوەی زیندانی ١٥ ساڵ سزا كرا.



پێداچوونەوە/ ئارام غەفور



created by Avesta Group and powered by Microsoft Azure