نێزیكى 20 هزار كه‌س ل دهۆك تووشى نه‌خۆشییا شه‌كرێ بووینه‌

هەواڵ / کوردستان :: 14/11/2018‌ :: 213‌ جار بینراوە

دواڕۆژ، بورهان یه‌حیا
ل ژێڕ درووشمێ (خێزان و نه‌خۆشییا شه‌كرێ) رۆژا جیهانییا نه‌خۆشییا شه‌كرێ ل دهۆك هاته‌ ساخكرن و هاته‌ راگه‌هاندن كو 12.5% ژ خه‌لكێ دهۆك كو دبنه‌ نێزیكى 20 هزار كه‌س تووشى ڤێ نه‌خۆشیێ بووینه‌.


حه‌مزه‌ محه‌مه‌د عه‌لى، به‌رپرسێ راگه‌هاندنا رێڤه‌به‌رییا ساخله‌مییا پارێزگه‌ها دهۆك بۆ دواڕۆژ رۆهنكر: "ل گشت جیهانێ 425 ملیۆن كه‌س هه‌لگرێ نه‌خۆشییا شه‌كرێ نه‌ و ل سنۆرێ پارێزگه‌هێ ژى 12.5% ژ خه‌لكێ خۆجهـ كو دبنه‌ 19481 كه‌س تووش بووینێ و 4809 كه‌س ژ ئاواره‌ و په‌نابه‌ران ل سنۆرێ پارێزگه‌هێ تووشى ڤێ نه‌خۆشیێ بووینه‌".

دیاركر: "سه‌رجه‌مێ گشتیێ تووشبوویێن ڤێ نه‌خۆشیێ ل پارێزگه‌هێ دبیته‌ 24291 كه‌س و ژ سه‌رجه‌مێ 19481 كه‌س یێن خۆجهێن دهۆك 810 ژوان نه‌خۆشییا جۆرێ ئێك هه‌یه‌ و 18671 كه‌سێن دى جۆرێ دووێ و پترییا هه‌لگرێن ڤێ نه‌خۆشیێ ژنن و دووڤدا زه‌لام دهێن".

حه‌مزه‌ خویاكر كو: "دناڤا پترییا خێزانان دا هه‌لگره‌كێ ڤێ نه‌خۆشیێ هه‌یه‌ كو دڤێت ب زووترین ده‌م بهێته‌ دیاركرن و چاره‌سه‌رییا پێدڤى بۆبهێته‌كرن و باشترین رێكێن خۆپاراستنێ ژى دووركه‌ڤتنه‌ ژ خوارنێن نه‌ساخله‌م و به‌رنگاربوونا قه‌له‌ویێ و ئه‌نجامدانا وه‌رزشه‌كا رێكخستى".



created by Avesta Group and powered by Microsoft Azure