بڵاوبوونەوەی قارچكی ژەهراوی هەڕەشە لەژیانی هاوڵاتیان دەكات

هەواڵ / کوردستان :: 09/11/2018‌ :: 878‌ جار بینراوە

دواڕۆژ، رێبین حەسەن
بڵاوبوونەوەی قارچكی ژەهراوی بۆتە هەڕەشە لەسەر ژیان و تەندروستی دانیشتوانی سنووری قەزای پێنجوێن، نەخۆشخانەی گشتی قەزاکەش رایدەگەیەنێت: لەماوەی یەک هەفتەدا 20 هاوڵاتی سنوورەکە بەهۆی خواردنی قارچەکەوە ژەهراوی بوون.


لوقمان لەتیف، بەرپرسی راگەیاندنی نەخۆشخانەی گشتی شەهیدانی پێنجوێن، بەدواڕۆژی راگەیاند: لەماوەی یەك هەفتەدا، 20 هاوڵاتی بەهۆی خواردنی قارچكەوە ژەهراوی بوون و هاتوونەتە بەشی فریاكەوتنی نەخۆشخانەی پێنجوێن.

وتیشی: "ئەوەی تێبینیكراوە لەو هاوڵاتیانەی كە ژەهراوی بوون، زیاتر بەهۆی ئەو قارچكانەوە بووە كە لە نزیك كێڵگە كشتوكاڵییەكانەوە هەڵتۆقیون، ئەوەش بەهۆی ئەو دەرمانە كیمیاویانەی كە كراوە بە تەماتە و شووتی و سەوزەواتەكاندا و كاریگەری لەسەر قارچكەكە درووستكردووە".

ئەوەشی خستەڕوو: لەسنووری پێنجوێن و بەتایبەت لەوەرزی پایزدا قارچكی زۆر دەبینرێت و هاوڵاتیانیش ڕۆژانە دەیهێننەوە بۆ خواردن و فرۆشتن، بەڵام هەندێك جۆری قارچك ئەوەندە مەترسیدارە تا ڕادەی مردن مرۆڤ دەخاتە مەترسییەوە.

ئەوەش لەكاتێكدایە لەچەند رۆژی رابردوودا، كچە خوێندكارێكی قۆناغی سێی بنەڕەتی لە پێنجوێن بەهۆی خواردنی قارچكەوە رەوانەی نەخۆشخانەی فریاکەوتنی سلێمانی کراو دواتر لەوێ گیانی لەدەستدا.



created by Avesta Group and powered by Microsoft Azure