پارێزگاری سلێمانی سەبارەت بەدروستكردنی بەنزینخانەكەی سەرچنار روونكردنەوە دەدات

هەواڵ / کوردستان :: 08/11/2018‌ :: 489‌ جار بینراوە

تاگ :: سلێمانی

دواڕۆژ، پشتیوان جەمال
پارێزگاری سلێمانی رایدەگەیەنێت، چەند مەرجێك بۆ كۆمپانیای جێبەجێكاری بەنزینخانەكەی ناوچەی سەرچناری شاری سلێمانی دانراوە و ئەگەر جێبەجێی كرد مۆڵەتی پێدەدرێت. دەشڵێت "ئەگەر کۆمپانیاکە یەک مەرج لەو مەرجانەی بۆی دانراوە جێبەجێ نەکات رێگەیان پێنادرێت بەنزینخانەکە دروست بکەن".


هەڤاڵ ئەبوبەكر، پارێزگاری سلێمانی سێشەممەی ڕابردوو، لە میانەی پێشوازی لە شاندی پارتی و سەبارەت بە راپۆرتی ئاوی ژێرزەوی بۆ مەترسییەكانی دروستكردنی بەنزینخانەیەك لە ناوچەی سەرچناری سلێمانی بە رۆژنامەنووسانی راگەیاند: ئەو بەنزینخانەیە پێش ئێمە مۆڵەتی پێدراوە و رەزامەندی لایەنە پەیوەندیدارەكانی وەرگرتووە، كاتێك وتراوە ئەو بەنزینخانەیە زیانی بۆ ئاوی چاوگی سەرچنار دەبێت چەندین لیژنە و دواجاریش لیژنەیەكی 11 كەسی پسپۆرمان پێكهێناوە و ئەوان چەند مەرجێكیان داناوە كە ئەگەر ئەو مەرجانە جێبەجێ بكرێن دروستكردنی بەنزینخانەكە زیانی نابێت.

رونیشیکردەوە: ئەگەر کۆمپانیاکە تەنیا یەكێك لەو مەرجانە جێبەجێ نەكات، ئەو بەنزینخانەیە نەك هەر ناكرێتەوە، بەڵكو لەسەر ئەو شوێنەش لادەبرێت و قەرەبووش ناكرێتەوە، بەڵام ئەگەر ئەو مەرجانە جێبەجێ بكات لایەنە پەیوەندیدارەكان وتویانە هیچ كێشەیەكی بۆ ئاوی سەرچنار و پیسبوونی ژینگە نییە و مۆڵەتی پێدەدەین و كاری خۆی دەكات.

ئەو وتانەی پارێزگاری سلێمانیش لە كاتێكدایە، هەفتەی رابردوو رێكەوت زەكی، ئەندامی لیژنەی پیشەسازی و وزە لە ئەنجومەنی پارێزگای سلێمانی لە كۆنگرەیەكی رۆژنامەوانیدا ئاشکرایکرد: دەبێت هەموو لایەك ئاگادار بن سەرچاوەی ئاوی كانی سەرچنار لەبەردەم مەترسی پیسبوون و ژەهراویبوونە ئەویش بەهۆی دروستكردنی وێستگەیەكی سووتەمەنی لەنزیك سەرچاوەی ئاوەكە كە كاریگەری بۆ چینەكانی ژێرەوەی ئاوی ژێرزەوی دەبێت.

وتیشی: "پارێزگاری سلێمانی لە مانگی شوباتەوە مۆڵەتی دروستكردنی بەنزینخانەکەی پێداون، ئێمە هەر لەسەرەتاوە زانیومانە ئەو شوێنە بۆ دروستكردنی بەنزینخانە ناگونجێت، بۆیە بەدواداچوونی جددی بۆ كراوە و ئاوی ژێرزەویش لیژنەیەكیان دروستكردووە".



  • ڕۆژ
  • هەفتە
  • مانگ
created by Avesta Group and powered by Microsoft Azure