بۆچی بازاڕی لەنگەی هەولێر ئاگری گرت؟

هەواڵ / چاوپێکەوتن :: پێش 2 هەفتە ‌ :: 2341‌ جار بینراوە
شوان کەمال

دواڕۆژ، سامان قوبادی
راهێنەرێكی بواری سەلامەتی پێیوایە ناكرێت پێش لێكۆڵینەوەكان، سەرچاوەی ئەو ئاگرەی لە بازاڕی لەنگەی هەولێر كەوتەوە بگەڕێنرێتەوە بۆ شۆرتی كارەبا. شوان كەمال  راهێنەری بواری سەلامەتی، لە دیدارێكی دواڕۆژدا باس لە كێشەكانی بینا و مۆڵ و بازاڕەكان دەكات لە رووی سەلامەتییەوە، هاوكات چەندین چارەسەری پێشكەوتووی هاوچەرخ بۆ رێگریی لە ئاگركەوتنەوە دەخاتەڕوو.


دواڕۆژ:  سیستمی سەلامەتی چییە؟
شوان كەمال: ئەو پرۆگرامانەن كە بەكاردەهێنرێن بۆ هەڵسەنگاندن و كۆنترۆڵكردنی مەترسییەكان لە شوینی كار بێت یاخود لە شوێنە گشتیەكان, بەتەنیا نەبەستراوەتەوە بە پاراستن لە ئاگر، بەڵكو پاراستن لە هەموو جۆرە مەترسییەك دەگرێتەوە كە ئاگریش یەكیكە لەو مەترسییانە. بۆ نموونە پێویستە پرۆگرامی تایبەتمان هەبێت بۆ پاراستنی هاووڵاتییان لە شاری یارییەكان, بازاڕ و مۆلەكان, زانكۆ و پەیمانگاكان, باخچەی ساوایان و قوتابخانەكان، پێویستە یاسای تایبەتی بۆ دەربكرێت و فەرز بكرێت بەسەر ئەو لایەنانەی شوێنە گشتییەكان بەڕێوەدەبەن.

دواڕۆژ: چی دەڵێیت دەبارەی ئاگرەكەی چەند رۆژی رابردووی بازاڕی لەنگەی هەولێر؟
شوان كەمال:
ئاگرەكەی بازاڕی لەنگەی هەولێر بەیەكیك لە رووداوە هەرە گەورەكانی ئاگركەوتنەوە دادەنرێت كە تائێستا لە كوردستان روویدا بێت. نزیكەی 2400 دوكان سووتاون و زیانیكی مادیی زۆری لێكەوتەوە، پێویستە لێكۆڵینەوەیەكی زانستیانەی تیادا بكرێت و هۆكارە دەستەجێیەكان و ریشەییەكانی بدۆزرێنەوە و پلان و یاسای گونجاوی بۆ دابنرێت بۆ دووبارەنەبوونەوەی. تائێستا لیژنەی لیكۆڵینەوە هۆكارەكانی نەخستوەتەڕوو. سالی 1985 لە بریتانیا ئاگریك لە یاریگایەك دەكەویتەوە، لەكاتی یاریی دوو تیم، بەو هۆیەوە 55 كەس گیانلەدەستدەدەن و 256 كەسیش بریندار دەبن، لەوكاتەدا تەختە بەكاردەهێنرا لە یاریگاكاندا، لە دوای ئەو رووداوەوە بەیاسا بڕیاردرا كە بەهیچ شێوەیەك تەختە بەكارنەهێنرێ و چەندین یاسای تر دەركران بۆ چارەسەركردنی هۆكارە ریشەییەكان.

دواڕۆژ: هۆكاری ئاگرەكەی هەولێر چی بوو؟ چی بكرێت بۆ رێگرتن لە دووبارەبوونەوەی؟ 
شوان كەمال:
هۆكارە ریشەییەكانی بریتین لە: یەكەم، خراپی  كوالێتی كەرەستە كارەباییەكان كە پێویستە بە یاسا كەرەستەی كارەبای كوالیتی بەرز فەرز بكرێت بەسەر ئەو كۆمپانیا و كەسانەدا كە شوێنە گشتییەكان بەڕێوەدەبەن. لە ئەمریكا هەر كەرەستەیەك لەلایەن "رابیتەی نیشتمانی بۆ پارێزگاریی لە ئاگركەوتنەوە" پەسەند نەكرێت نابێت بەكاربهێنرێ. دووەم، كە زۆر گرنگە  تەنها كەسانی كارامە و بەتوانا كاری كارەبایی بكەن، بۆ نموونە جاری وا هەیە سیستمی كارەبای شوێنە گشتییەكان باشە، بەڵام لەكاتی چاكسازیدا كەسانی نەشارەزا بارودۆخێكی كارەبایی ناسەلامەت دروست دەكەن، باشترین رێگایش ئەوەیە كە پەیمانگای باوەڕپێكراو بكرێتەوە و كەسانی پسپۆر پێبگەیەنن. سێیەم، نەبوونی چاودێریكردنی بەردەوامی شوێنە گشتییەكان لەلایەن تیمی پسپۆرەوە بۆ دڵنیابوون لە مەرجەكانی سەلامەتی, پێویستە لیژنەگەلی مەرجەكانی سەلامەتی هەبن و هەموو جۆرە پسپۆریەكانی تیابێت. چوارەم، بوونی تەنكی گاز و نەوت و موەلیدە لە نزیك شوێنە گشتییەكان دوور لە مەرجەكانی سەلامەتی، بەڵام دوو سیستم هەن بۆكەمكردنەوەی زەرەر و زیانی ئاگر، یەكەم:Passive Fire Protection  سیستمێكە بایەخ بەو كەرەستانە دەدات كە لە بیناكاندا بەكاردەهێنرێن و پێویستە بەرگرییان هەبێت بۆ ئاگر و نەهێڵن زوو تەشەنە بكات، بۆ نموونە هەڵبژاردنی دەرگاكان و خشت و بلۆكی دیوارەكان و سەقف و زەویەكە لە كەرەستەیەك دروست بكرێت كە بەرگریی ئاگری هەبێت و نەهێڵێت بەئاسانی بڵاوبێتەوە، ئەمە بەیاسا فەرزبكرێت. دووەم:Active Fire Protection  سیستمێكە بایەخ دەدات بەو كەرەستانەی كە پێویستە بەكاربهێنرێن لە دوای روودانی ئاگرەكە، وەك زەنگی ئاگاداركردنەوە، سپرینكلەر سیستم كە وەك دوش وایە و ئاو فڕێ دەداتە خوارەوە, ئاگركوژینەوەی دەستی و سۆندەی ئاو لەناو بیناكان، ئامێری هەستكردن بە دووكەڵ، ئەمانە لە رووداوەكەی بازاڕی لەنگەی هەولێر زۆر لاواز بوون، بۆیە لەسەرەتاوە هەستی پینەكراوە و بە زوویی بڵاوبوەوە.

دواڕۆژ: ئایا گونجاوە هۆكاری هەموو ئاگرێك لەكوردستاندا ببەینەوە بۆ شۆرتی كارەبا؟ بە باوەڕی تۆ هۆكاری ئاگرەكەی هەولێر-یش شۆرتی كارەبا بوو؟
شوان كەمال:
بۆ دروستبوونی ئاگر پێویستمان بە سێ شتە, ئۆكسجین, كەرەستەی گڕگرتوو، سەرچاوەی گەرمی، لە رووداوەكەی هەولێر لە دوای بوونی ئۆكسجین و كەرەستەی گڕگرتوو كە بریتی بووە لە جل و بەرگی ناو بازاڕەكە، تەنیا شت كە ماوە سەرچاوەی ئاگرەكەیە، دەكرێت شۆرتی كارەبا یان جگەرە یاخود بە ئەنقەست ئاگرەكە كرابێتەوە, هەمووی ئەگەرن. لە كوردستان جارێ لێكۆڵینەوەكان تەواو نەبوون كەچی هۆكارەكەی دەگێڕننەوە بۆ شۆرتی كارەبا! ئەوەی كە لەم رووداوەدا پێویستە بەجدیی لێكۆلینەوەی لەسەر بكرێت ئەوەیە كە ئایا سەرچاوەی ئاگرەكە لەچییەوە بووە؟ ئەویش لەسەر بنەمای زانستی و بەڵگە.

دواڕۆژ: پێتوایە تاچەند بازاڕەكانی هەرێم، بەتایبەت ئەوانەی بەشێوەی داخراو دروستكراون، سەلامەتن؟
شوان كەمال:
بەتایبەت بازاڕە كۆنەكان و پاركە داخراوەكانی ئۆتۆمبێل لە كوردستان تاڕادەیەكی زۆر مەترسیی ئاگریان لەسەرە، ئەمەیش لەبەر كۆنی و بێكەڵكیی سیستمی كارەبایی و نەبوونی ئەو دوو سیستمەی باسمانكرد.   

دواڕۆژ: بە رای تۆ بینا و مۆڵە مۆدێرنەكان تاچەند سیستمی سەلامەتییان تیادایە بۆ خۆپاراستن لە ئاگر؟
شوان كەمال:
مۆڵ و بینا مۆدێرنەكان، ئەوانەی كە لەلایەن كۆمپانیا نێودەوڵەتییەكانەوە دروست كراون، تاڕادەیەكی زۆر باش پەیڕەوی مەرجەكانی سەلامەتییان تێدا كراوە، وەك بوونی سپرینكلەر سیستم و ئامێری هەستكردنی دووكەڵ و ئامێری ئاگركوژێنەوە و بوونی ئەلارمی ئاگاداركردنەوە، ئەمانەیش بەردەوام پێویستیان بە صیانە هەیە و پێویستە كارمەندی شارەزایش هەبن بۆ بەكارهێنانیان، پێویستە هەموو مۆڵێك و هۆتێلێك بە بەردەوامی پلانەكە بۆ رووبەڕووبوونەوەی ئاگركەوتنەوە تاقی بكەنەوە. 

دواڕۆژ: زۆرێك لەخاوەن دووكانەكان پرسیار دەكەن ئایا بۆ بازاڕی لەنگە دەسووتێت و مۆڵەكان ناسووتێن؟
شوان كەمال:
لە هەر شوێنێك ئۆكسجین و كەرەستەی گڕگرتوو و سەرچاوەی ئاگر بەیەكەوە كۆببنەوە، دەبێتە هۆی ئاگر، ئیتر لە مۆڵ بێت یاخود لە بازاڕی لەنگە, بەڵام خراپیی سیستمی كارەبا لەو شوێنانەدا و بوونی شتومەكێكی زۆر بە ناڕێكی لە دوكانەكاندا فاكتەرن بۆ زیادكردنی ئەگەرەكان؟.

دواڕۆژ: ئایا رۆڵی حكومەتی هەرێم چییە و چۆن دەتوانێت كاریگەر بێت لە دووبارەنەبوونەوەی ئەو رووداوانە؟
شوان كەمال:
بێگومان رێكخستنی سەلامەتی لە شوێنە گشتیەكاندا پێویستیی بە یاسا و رێنماییە لە دامودەزگاكانی حكومەتدا. پێویستە چاودێریی سیستمەكانی سەلامەتی بكرێت و كەموكورتییەكانی چارەسەر بكرێن.

دواڕۆژ: ئەی رۆڵی بەرگریی شارستانی چییە؟
شوان كەمال:
دوو جۆر لێپرسراوێتیان لەسەرشانە، یەكەم: دڵنیابن كە شوێنە گشتییەكان هەردوو جۆرە سیستمەكانی سەلامەتیی ئاگریان تیایەPassive fire protection and Active fire protection  و ئایا شوێنە گشتییەكان پلانی رووبەڕووبوونەوەی رووداوی كتوپڕیان هەیە و ئەو پلانەیش بە پراكتیكی جێبەجێ دەكریت؟. بەردەوام دەبێت كاری لەسەر بكەن و بە هەماهەنگی لەگەڵ وەزارەتەكانی حكومەت هەوڵ بدەن یاسای تایبەت بە شوێنە گشتییەكان دەربكرێت و هەمیشە چاودێریی شوێنە گشتیەكان بكەن و لێپرسینەوە لەگەڵ كەسانی كەمتەرخەم بكەن. دووەم: بە بەردەوامی پێش و پاش رووداوی ئاگركەوتنەوە، بە دوای خاڵە لاوازەكانیاندا بگەڕێن و چارەسەری بكەن، بۆ نموونە ئایا تاچەند كەرەستەی پێویستیان هەیە بۆ كوژاندنەوەی ئاگر؟ ئایا تیمی پێویستیان هەیە بۆ هەموو جۆرە رووداویك؟ ئایا لەتوانایاندا هەیە مامەڵە لەگەڵ رووداوی گەورەدا بكەن؟ ئایا راهێنانی پێویستیان وەرگرتوە لەسەر چۆنیەتی رووبەڕووبوونەوەی رووداوی گەورە؟ 



  • ڕۆژ
  • هەفتە
  • مانگ
created by Avesta Group and powered by Microsoft Azure