شنگالی داخوازا رێڤەبەریەکا بێلایەن دکەن

هەواڵ / ڕاپۆرت :: پێش 2 هەفتە ‌ :: 180‌ جار بینراوە

تاگ :: شەنگال

دواڕۆژ، رەڤەند گوھەرزی
پشتی زێدەتری سالەکێ ئیدارا ھەلبژاردی یا شنگال ئەو باژار چۆلکری، ٣١-ێ چریا پێشی یا ئەڤ سالە، ڤەگەریا وێ قەزایێ، لێ شنگالیێن نوکە ل باژارێ خوە دمینن ل رێیا (کانی شەمامک) رێ ل بەرپرسێن ئیدارەیا شنگال گرتن و نەھێلان دەربازی ناڤ شنگال ببن.


عەلی پیر، ئێک ژ چالاکڤانێن ئێزدییان-ە، ل شنگال نەرازییە ژ بەرپرسێن ئیدارا بەرێ، بۆ دواڕۆژ گۆت:"ئێدی خەلک بندەستیێ و زۆرداریێ قەبۆلناکەت، ئەو خەلکێ دژی ڤەگەریانا ئیدارا شنگال خوەنیشاندان کرین نە دژایەتییا پارتیەکێ دکەن، یان فکرەکا سیاسی، دژایەتییا وان کەسان دکەن یێن تشتەک بۆ شنگال نەکرین".

ڤی چالاکڤانی خوەیاکر:"نوکەژی ھەستیکێن ئێزدییان د گۆرێن بکۆم دانە، لێ جھێ داخێیە ئەو ئیدارە نەشیایە ڤان گورێن بکۆم ڤەکەن، چنکو ئەو ئیدارە زێدەتر یا حزبییە و خوە بسەر لایەنێن حزبیڤە ددەنە نیاسین، لەورا وەلاتیێن شنگال ئیدارەکا دوور ژ حزبان دخوازن".

نەرازیبوونا روونشتڤانێن نوکە یێن شنگال بوونە ئەگەر بەرپرسێن ئیدارەیا بەرێ نەڤەگەرن شنگال و نوکە ل شوونا مەحما خەلیل دەڤەر‌دارێ بەرێ یێ شنگال فەھد حامد کاروبارێن دەڤەر‌داریێ ب رێڤەدبەت کو ژ ئالیێ حەشدا شەعبی ل ١٦-ێ چریا پێشییا سالا دەر‌بازبووی ھاتبوو دانان و خۆدێدا چۆکی، ناحییا سنونێ ب رێڤەد‌بەت کو مەزنترین ناحییا شنگال-ە.

رۆژا ٦-ێ مەھا دەر‌بازبووی، نوفل عاکۆب ، پارێزگارێ مووسل د دسەرەدانەکێ دا بۆ شنگال راگەھاندبوو:"ئەگەر بەرپرسێن ئیدارا شنگال نەڤەگەرن شنگال دێ وان ژکاری دەرکەم".

دەمێ وەلاتیێن شنگال رێ ل ڤەگەریانا بەرپرسێن ئیدارا شنگال گرتی ھێزێن حەشدا شەعبی و پۆلیس و لەشکەرێن ئیراقێ چو کارڤەدانێن دژوار بەرامبەر خوەنیشاندەرێن ئێزدی نەبوون.

لسەر وی ھەلوەستێ ھێزێن ئیراقی و پارێزگارێ مووسل، قادر قاچاخ بەرپرسێ لقا شنگال یا پارتی دیموکراتی کوردستان، بۆ میدیایا پارتیا خوە راگەھاندبوو:"پارێزگارێ مووسل خیانەت ل وان کریە".

فەھد حامد، دەڤەردارێ شنگال یێ کو ژئالیێ حەشدا شەعبی ھاتیە دانان بۆ دواڕۆژ گۆت:"زێدەتر ژ سالەکێ حەشدا شەعبی و لەشکەرێ ئیراقێ دەربازی شنگال بووینە و دگەل ئالاو ھەیبەتا حکومەتا ئیراقی، پێشمەرگێن پارتی دیموکراتی کوردستان خوە ژ شنگال ڤەکێشان و بەرپرسێن ئیدارا کەڤن ژی دگەل وان پێشمەرگان چوونە دھۆک ڤالابوونەک ئیداری ل پاش خوە ھێلان". 

ناڤبۆری ئینازمان:"حەشدا شەعبی و لەشکەرێ ئیراقێ و پولیسێن فیدرالی و پولیسێن محەلی دگەل زەلامێن ئایینی یێن دەڤەرێ دگەل سەرۆک ئەشیرێن دەڤەرێ، ئەز بۆ دەڤەرداریێ ھەلبژاردم دا ئەو جھـ ڤالا نەمینیت و خزمەتا خەلکی بھێتەکرن".

حامد گوت:"بتنێ وەلاتیێن شنگالێ رێگری ل ڤەگەریانا بەرپرسێن ئیدارا کەڤن یا شنگال کرن کو ھەفتییا دەر‌بازبووی ھەرسێ رێڤەبەرێن ناحیێن قەحتانیە و سنونێ و قەیرەوان دگەل پارێزگاز و سەروکێ ئەنجومەنێ موسل و قایمقامێ کەڤن دگەل فەرماندێ سەربازی یێن عیراقی و حەشدا شەعبی ھاتنە شنگالێ، لێ خەلکێ شنگالێ ل دەریێ شنگال رێیا وان گرتن و گۆتنە وان؛ ھوون رەڤینە.‌ کێ گۆتبوو ھون برەڤن؟".

لسەر وێ رێگریا ل وان ھاتیە کرن مەحما خەلیل دەڤەردارێ شنگال بۆ دواڕۆژ گۆت:"خەلکی شنگال چو خوەنیشاندان نەکرینە. ٤٠-٥٠ مرۆڤەک ھاتبوون پێشییا وان و حەشدا شەعبی ئەو پالدابوون".

خەلیل زەلالکر:"ئەو کەسێن خوەنیشاندان کرین نە خەلکێ شنگالێ بوون، ئەو خەلکی بەعاج و خانەسۆرێ بوون، مە زانیاری ل سەر ھەبوون کو چەند کەسەک ژ سوریا ھاتبوون و خەلکێ ژقامیشلو ئینابوون". 

قایمقامێ بەرێ یێ قەزا شنگال گوت:"ئەم یێ ئیدارا خەلکی شنگال دکەین، چنکو ٨٥% ژ وەلاتیێن شنگال دناڤ کەمپاندا دژین".

نوکە، رێڤەبەریا خوەسەریا دیموکرات ل شنگال، خودان مەزنترین روولە، چنکو دگەل ھەبوونان چەندین ئەنجۆمەنێن سڤیل ژمارەکا مەزن یا ھێزێن چەکدار وەک یەکینەیێن بەرخوەدانا شنگال، یەکینەیێن ژنێن شنگال و ئاسایشا پاراستنا ئێزدیخانێ گرێدای رێڤەبەریا خوەسەریا دیموکرات یا شنگال-ن.

حەسۆ شنگالی، ئەندامێ رێڤەبەریا خوەسەریا شنگال بۆ دواڕۆژ گۆت:"ئەگەر بەرپرسێن ئیدارەیا کەڤن یا شنگال ڤەگەرن شنگال مە چو ئاریشە دگەل وان نابیت، لێ ب مەرجەکی ئەو ژی؛ ئەگەر ئەو بەرپرس ئەژیندایێن چو حزبان بکارنەئینن، رۆژێن بھێت ژی گەلێ شنگال چو بڕیار بدەت ئەمێ دێ دگەل بین".

لگۆر ‌زانیاریێن دواڕۆژ نوکە نێزیکی ٢٠% ژ وەلاتیێن شنگال یێن سالا ٢٠١٤-ێ ئاوارەبووین ڤەگەریاینە شنگال کو پتریا وان ل ناحیا سنونێ دمینن، لێ ئەو وەلاتی چاڤەرێی رێڤەبەریەکا ھەژیتر و دوور ژ جێبەجێکرنا پلانێن حزبان دکەن.

 



  • ڕۆژ
  • هەفتە
  • مانگ
created by Avesta Group and powered by Microsoft Azure