لە سلێمانی رێگری لە دانانی پەیکەر دەکرێت

هەواڵ / کوردستان :: 05/11/2018‌ :: 609‌ جار بینراوە

دواڕۆژ، پشتیوان جەمال
رەخنە لە بڕیارێكی شارەوانی سلێمانی دەگیرێت كە داوای پێداچوونەوە و رێكخستنەوەی دانانی پەیكەری كردوە، بەڕێوەبەری گشتی رۆشنبیریش دەڵێت: "لیژنەیەك بۆ چۆنیەتی دانانی پەیكەر دروستكراوە و لەداهاتوویەكی نزیكدا دەستبەكاردەبێت".


بەپێی نوسراوێكی شارەوانی سلێمانی بەواژۆی یوسف یاسین، سەرۆكی پێشووی شارەوانی كە لە رۆژی 26ی ئابی 2018 ئاڕاستەی نووسینگەی پارێزگاری سلێمانی كراوە و وێنەی دەست دواڕۆژ كەوتووە، داوای پێداچوونەوە و رێكخستنەوەی دانانی پەیكەریان لە سلێمانی كردوە.

لەو نووسراوەدا هاتووە: "ئاگاداری بەڕێزتان دەكەین كە سەرۆكایەتی شارەوانی سلێمانی بۆ ماوەیەك داواكاری و دانانی پەیكەر لە سلێمانی رادەگرێت، بەمەبەستی پێداچوونەوە و رێكخستنەوەی ئەو ناڕێكییەی كە لە شێوازی دانانی پەیكەردا هەیە، بۆ ئاگاداری و زانیاریتان".
 
چێنەر نزار، پەیكەرساز لە لێدوانێكدا بۆ دواڕۆژ رایگەیاند: حاڵەتێكی سەیرە لە كۆتایی ئەمساڵدا لەلایەن سەرۆكایەتی شارەوانی بڕیاری راگرتنی دانانی پەیكەر دراوە و هەموو فەرمانگە رەسمییەكانیش كە پەیوەندییان بەم پرۆسەیەوە هەیە دەستبەجێ جێبەجێی دەكەن، ئەم شێوازە بڕیارانە لێكەوتەی باشی لێناكەوێتەوە، چونكە هەموو دونیا كار دەكەن بۆ هەبوونی كاری هونەری ئاستبەرز و قوڵ.

چێنەر وەكو گەنجێكی پەیكەرساز ئاماژەی بەوەدا: "ئەگەر دەتانەوێت كاری باش بكەن ئەوا هونەری سیاسی مەهێڵن كە بوونەتە تۆرانی هەموو ئەو بینینانەی هەن، چونكە هونەری رابردوو دەرهاویشتەی سیاسەتە بۆیە كەشێكی ناڕێكی بێكوالێتی دروستبووە".

هەروەها وتیشی: "بەڕاستی شەرمە لەپایتەختی رۆشنبیری (بەناو) ئەم بڕیارانە بدرێت، تكایە سلێمانی تێك مەدەن بە بڕیارە نادروستەكانتان لەسەر قسەی كەسانێك هەموو ژیانیان لە خۆشی هەندەران بووە لەساتە ناخۆشییەكاندا خۆیان ون كردووە ئێستاش هاتوونەتەوە و رێگرن لە كاركردنێك كە دەبێت هەبێت و دەشزانن هونەر چەند گرنگە".

ئەو بڕیارەی شارەوانی سلێمانی لە كاتێكدایە رۆژی یەكشەممە 4ی تشرینی دووەمی 2018 پەیكەری مامۆستای كۆچكردوو رەفیق حیلمی، لە بەردەم پەروەردەی رۆژئاوای شاری سلێمانی دانرا كە لەسەر ئەركی بەڕێوەبەرایەتی گشتی رۆشنبیری سلێمانی دروستكرابوو.

بابەكر دڕەیی، بەڕێوەبەری گشتی رۆشنبیری و هونەر لە سلێمانی بە دواڕۆژی راگەیاند: پێش ئەو نووسراوە رەزامەندی دانانی ئەو پەیكەرە لەبەردەم پەروەردەی رۆژئاوا وەرگیراوە، بەڵام لەمەودوا ئەو بڕیارە دەكەوێتە بواری جێبەجێكردنەوە.

ناوبراو ئاماژەی بەوەكرد: بۆ پێداچوونەوەی دانانی پەیكەر لیژنەیەك لە پارێزگا و شارەوانی و رۆشنبیری دروستكراوە و دەستبەكار دەبێت بۆ چۆنیەتی دانانی پەیكەری نوێ.

دڕەیی رەتیكردەوە: ئەو بڕیارە بۆ رێگری لە دانانی پەیكەر بێت و وتی: "بڕیارەكە بۆ رێگری نییە، بەڵام دانانی پەیكەر رێكدەخرێتەوە، ناكرێت خەڵك بێ پرسی پارێزگا و شارەوانی و رۆشنبیری لەناو بازاڕدا پەیكەر دابنێت، چونكە خەڵك هەبووە بێ پرس پەیكەری داناوە، لەمەودوا دەبێت لیژنەكە بۆ دانانی پەیكەر رەزامەندی بدات".



created by Avesta Group and powered by Microsoft Azure