دواڕۆژ پڕۆژەیەکی گرنگ رادەگەیەنێت

هەواڵ / کوردستانی :: پێش 2 هەفتە ‌ :: 6036‌ جار بینراوە

دواڕۆژ

لەگەڵ سێیەمین ساڵیادی وێبسایتی دواڕۆژدا، دەزگای دواڕۆژ بۆ رووناکبیری و راگەیاندن دامەزراندنی (توێژینەوەی دواڕۆژ) رادەگەیەنێت وەک ناوەندێک بۆ لەخۆگرتنی توێژینەوەی زانستیی پەیوەندیدار بە بارودۆخی سیاسی و حوکمڕانی و ئابووری و رەهەندەکانی تر لە کوردستان و عێراقدا.
مانگانە دواڕۆژ بابەتێکی جێگەی بایەخ دەستنیشان دەکات و توێژەران بانگهێشت دەکات لە ماوەی چوار هەفتەدا توێژینەوەکانیان بەپێی مەرجە دیاریکراوەکان رەوانە بکەن.
ئامانج لەم هەوڵەی دەزگای دواڕۆژ بەرهەمهێنانی تێگەیشتنێکی زانستییانەیە لە ئێستا و داهاتووی ئەو رەهەندە جیاجیایانەی ژیانی کوردستان و خستنەڕووی پێشنیاری گونجاو بۆ بەردەم بڕیاردەران و کاربەدەستان تاوەکو بتوانن لە ئەگەری پەرەسەندنە جیاجیاکاندا ئەوپەڕی سوود لە دەرفەتەکان وەربگرن و کەمترین زیان لە مەترسییەکان بکەن.

بانگهێشت بۆ توێژینەوە:
بابەتی توێژینەوە: ئابووریی کوردستان بەرەو کوێ؟
بۆ ئەم مانگە، توێژینەوەی دواڕۆژ بایەخ بە بابەتی ئابووریی دەدات، بۆ نمونە:
- ناوخۆیی: بوژرانەوە یان چەقبەستن لە ئابووریی هەرێمی کوردستاندا، کاریگەریی دۆخی ئابووریی هەرێم لەسەر هاووڵاتیان، خزمەتگوزارییەکان و کایەی سیاسی لە هەرێم. ئاسۆکانی رەوشی ئابووریی ناوچە کوردستانییە دابڕاوەکان، خۆژێنی یان پشتبەستوویی ئابووری لە هەرێم، و تادوایی.
- دەرەکی: کاریگەریی دۆخی ئابووریی عێراق، ئێران، تورکیا لەسەر ئابووریی هەرێمی کوردستان، دەرفەتی بوژانەوە یان قەیرانی ئابووریی، بەکارهێنانی چەکی ئابووری بەرامبەر هەرێمی کوردستان، و تادوایی.
تکایە توێژینەوەکانتان هەتا رۆژی 1/12/2018 رەوانەی دواڕۆژ بکەن.

مەرجەکان:
توێژینەوەکە لەلایەن خودی توێژەرەوە ئامادە کرابێت و وەرگیراو وەرگێڕدراو نەبێت. لە گۆڤار و کەناڵی تر بڵاو نەکرابێتەوە. بە زمانی کوردی بێت و دوو هەزار تا پێنج هەزار وشە لەخۆ بگرێت. مەرجە زانستییەکانی توێژینەوەی رەچاو کردبێت و سەرچاوەکانی توێژینەوەکەی سەرچاوەی باوەڕپێکراو بن و بەڕوونی لە کۆتایی توێژینەوەکەدا بەپێی ریزبەندیی بەکارهێنانیان تۆمار کرابن. توێژینەوەکە بە فایلی (وۆرد) و بە فۆنتەکانی عەلی یان یونیکۆد رەوانە بکرێن. توێژینەوەکە جگە لە بەشە باوەکانی توێژینەوە، بەشێکی بۆ خەمڵاندنی زانستییانەی داهاتوو وە خستنەڕووی سیناریۆ و پێشنیاری گونجاو لەبواری بابەتی توێژینەوەکەدا تەرخان بکات.

هاوپێچ لەگەڵ توێژینەوەکەدا، توێژەر پرۆفایلی زانستیی خۆی بنێرێت کە تۆماری توێژینەوەکانی پێشووی لەخۆبگرێت.

ئەو توێژینەوانەی قبوڵ دەکرێن، لە (توێژینەوەی دواڕۆژ)دا بڵاو دەکرێنەوە و بەپێی گرنگییان پاداشت دەکرێن.

بۆ وەرگرتنی زانیاریی زیاتر پەیوەندیی بکە بە: [email protected]
لاپەڕەی تایبەت بە توێژینەوەی دواڕۆژ کلیک بکە

 



  • ڕۆژ
  • هەفتە
  • مانگ
created by Avesta Group and powered by Microsoft Azure