نوێترین زانیاری لەسەر ئەگەری گرانبوونی بەنزین لەهەرێم

هەواڵ / ئابوری :: 03/11/2018‌ :: 1046‌ جار بینراوە

دواڕۆژ، پشتیوان جەمال
وتەبێژی بەنزینخانەكانی شاری سلێمانی رایدەگەیەنێت: تائێستا كێشە لە بەنزیندا نییە و باوەڕیش ناكات گرفتێك دروست ببێت.


بەهمەن شێخ قادر، وتەبێژی بەنزینخانەكانی شاری سلێمانی بە دواڕۆژی راگەیاند: تائێستا هیچ كێشەیەك لە نرخ و بڕی بەنزیندا نییە و باوەڕ ناكەم كێشەش دروست ببێت.

بەوتەی ناوبراو، تائێستا لەئێران و توركیا و مەرزە لاوەكییەكانەوە بەنزین دێت، ئەگەر ئێرانیش داخرا، ئەوەی توركیا دێت، ئێستا ئەوەی بەسرەش رەزامەندی وەرگیراوە و رەنگە لە چەند رۆژی داهاتوودا ئەو بەنزینە بۆ سلێمانی بێت".

ناوبراو وتیشی: "وەك خۆم ناترسم بۆ كەمبوونەوەی بەنزین، ئێستا ترسی زۆر كەممان هەیە، چونكە لە بەغدا و توركیاشەوە بۆمان دێت".

ئەمە لەكاتێكدایە بڵاو بوونەوەی دەنگۆی ئەگەری گرانبوون و كەمبوونەوەی بڕە بەنزینی سلێمانی نیگەرانی لای بەكارهێنەرانی ئەو وزەیە دروستكردووە.

بەگوێرەی زانیارییەكان، ئەو بڕە بەنزینەی لەئیماراتەوە دەهات، پێشتر لە بەندەر عەباسەوە دەهات و پاشان بۆ هەرێم، بەڵام دوای جێبەجێكردنی سزاكانی ئەمریكا بۆ سەر ئێران، ئەو دەروازەیە نامێنێت، بۆیە بەوتەی بەهمەن شێخ قادر، رێككەوتن كراوە كە لەجیاتی بەندەر عەباس، بەندەری بەسڕە بەكاردەهێنرێت و بەنزین لەوێوە دێت.

سەبارەت بەهەرزانبوونی نرخی بەنزینیش، ناوبراو رایگەیاند: هەر كاتێك لەبۆرسەی جیهانی نرخەكانی نەوت بەشێوەیەكی جێگیر دابەزینیان بەخۆوە دی، ئەوا لای ئێمەش نرخی بەنزین دادەبەزێت، بەڵام لەبەرئەوەی سەقامگیریی نییە، هێشتا ئەو نرخانە وەك خۆیان ماون.



created by Avesta Group and powered by Microsoft Azure