پارێزگای هەڵەبجە لە چاوەڕوانی یەكەم مەرزی نێودەوڵەتیدایە

هەواڵ / ڕاپۆرت :: 01/11/2018‌ :: 394‌ جار بینراوە

دواڕۆژ، عەلی حەمە سەعید
پاش فراوانكردنی مەرزی پشتە لەسەر داوای حكومەتی عێراقی، ئێستا ئەو مەرزە ئامادەیە بۆ كردنەوە و 13 بەڕێوەبەرایەتی لە 35 دۆنمدا جێیان بۆ كراوەتەوە.


عادل مەلا ساڵح بەڕێوەبەری ناحیەی بەمۆی سەر بە پارێزگای هەڵەبجە، بە دواڕۆژی ڕاگەیاند: پێش چەند مانگێك لیژنەیەك لە دەستەی دەروازە سنوورییەكانی عێراق‌ سەردانی مەرزی پشتەی سەر بە ناحیەی بەمۆیان كرد و بۆ بەنێودەوڵەتیكردنی ئەو مەزرە كۆمەڵێك مەرجیان دانا، لە كردنەوەی 13 بەڕێوەبەرایەتی وەك گومرگ و هاتوچۆ و چەند بەڕێوەبەرایەتییەكی دیكە.

فراوانكردنی مەرزەكە مەرجێكی دیكەی لایەنی عێراقی بوو، بۆیە دوای زیاتر لە پێنج مانگ كاركردن، سەرجەم ئەو مەرجانە جێبەجێكراون و ئێستا مەرزەكە ئامادەیە كە بكرێتە نێودەوڵەتی.

ئاماژەی بەوەشكرد، لەلایەن بەرپرسانی دەروازە سنورییەكانی سەر بە حكومەتی عێراقییەوە ئاگادار كراوینەتەوە لە چەند ڕۆژی داهاتوو لیژنەی دەستەی دەروازە سنوورییەكانی عێراق سەردانی مەرزی پشتە‌ دەكەن و دوابڕیار لەسەر بەنێودەوڵەتی كردنی دەدرێت، چونكە تەواوی سنوری دەروازەكە تەلبەند كراوە و شوێنی فەرمانگەكانیش لە ڕووبەری 35 دۆنم زەویدا تەواو بووە.

حسێن عەزیز، یەكێك لە و شۆفێرانەی كە لە مەرزی پشتە ڕۆژانە كار دەكات بە دواڕۆژی ڕاگەیاند: لەسەر ئەركی خۆمان بە هاوكاری بازرگانانی سنورەكە، توانیومانە تەواوی كاروبارەكانی تایبەت بە فراوانكردنی مەرزی پشتە بە كۆتا بگەیەنین كە نزیكەی ٥٠٠ ملیۆن دیناری تێچووە و ئیدارەی پارێزگای هەڵەبجە و ئیدارەی گەرمیانیش بە دابینكردنی ئامێر هاوكارمان بوون.

بە گوێرەی بە دواداچوونەكانی دواڕۆژ، وەزارەتی دەرەوەی عێراق نووسراوی فەرمی ئاڕاستەی لایەنی ئێرانی كردووە بۆ ئەوەی هەر چوار مەرزی پشتە و تەوێڵە و كێلێ و سەیرانبەن بكرێنە دەروازەی نێودەوڵەتی، بەڵام لە ئێستادا تەنها مەرزی پشتە هەموو مەرجەكانی دەروازەیەكی نێودەوڵەتی تێدایە و ئامادەیە بۆ كردنەوە و لایەنی ئێرانیش لای خۆیانەوە ئامادەكارییان كردووە بۆ كردنی مەرزی پشتە بۆ بەنێودەوڵتی.

حسێن عەزیز، شۆفێر لە مەرزی پشتە بۆ دواڕۆژ ئەوەی وت: "لەئێستادا ڕۆژانە نزیكەی 170 ئۆتۆمبێل لە مەرزی پشتەوە كاڵا و شمەكی جۆراوجۆر لە ئێرانەوە هاوردەی هەرێمی كوردستان دەكەن، بەڵام هیچ كاڵا و شمەكێك لە هەرێمەوە ڕەوانەی ئێران ناكرێت، داهاتی ڕۆژانەی مەرزەكەش زیاد لە 40 ملیۆن دینار دەبێت، چونكە بۆ هەر ئۆتۆمبێلێك ڕۆژانە بڕی 10 هەزار دینارمان لێوەردەگیرێت بۆ چاككردنەوەی ڕێگای مەرزی پشتە، بەڵام تا ئێستا بەشێكی زۆری ڕێگاكە بەكەڵكی هاتوچۆكردن نایەت.

لە سنوری پارێزگای هەڵەبجە مەرزەكانی (شۆشمێ‌، مڵەخورد، سازان، دەرەی مەڕ، پشتە) بوونیان هەیە، بەڵام تائێستا تەنها لە مەرزەكانی شۆشمێ‌ و پشتەوە كاری بازرگانی دەكرێت، ئەگەر مەرزی پشتەش بەنێودەوڵەتی بكرێت دەبێتە یەكەم مەرزی فەرمی لە سنوری پارێزگای هەڵەبجە.



  • ڕۆژ
  • هەفتە
  • مانگ
created by Avesta Group and powered by Microsoft Azure