ئاسایبوونەوەی پەیوەندییەكانی عەرەب و ئیسرائیل بەرەو ئاشكرابوون دەچن

هەواڵ / جیهان :: 29/10/2018‌ :: 156‌ جار بینراوە

تاگ :: جیهان

دواڕۆژ
رۆژنامەی یەدیعۆت ئەحرۆنۆت-ی ئیسرائیل ئاشكرایكرد: گفتوگۆی نهێنیی هەیە لەنێوان بەحرەین و ئیسرائیلدا بۆ ئەوەی پەیوەندیی ئاشكرا لە نێوانیاندا دروستببێت.


رۆژنامەكە نووسیویەتی: "لەم رۆژانەدا گفتوگۆی نهێنیی بەحرەین لەگەڵ ئیسرائیدا دەستی پێكردووە لەپێناو دروستكردنی پەیوەندیی ئاشكرا لەنێوان هەردوو وڵاتدا و پێدەچێت لە ماوەیەكی كەمی داهاتوودا بنیامین نەتانیاهۆ سەرۆك وەزیرانی ئیسرائیل سەردانی مەنامە بكات و چاوی بە شای بەحرەین و بەرپرسانی باڵای ئەو دەوڵەتە عەرەبییە بكەوێت".

یەدیعۆت ئەحرۆنۆت ئەوەیشی روونكردووەتەوە كە گفتوگۆكانی ئیسرائیل لەگەڵ دەوڵەتانی عەرەبیدا دەچنە چوارچێوەی جێبەجێكردنی پلانەكەی ئەمریكاوە بۆ چارەسەركردن و یەكلاییكردنەوەی كێشەی عەرەب-ئیسرائیل كە بە (پێكهاتنی سەدە) ناو دەبرێت.

هاوكات پێگەی (i24)ئیسرائیل لێدوانێكی شێخ خالد بن ئەحمەد ئال خەلیفە وەزیری دەرەوەی بەحرەینی بڵاوكردووەتەوە كە دەڵێت "ئومێدەوارین هەوڵەكانی سوڵتان قابوس بن سەعید حاكمی سوڵتاننشینی عومان سەركەوتووبن بۆ تازەكردنەوەی پرۆسەی ئاشتیی نێوان ئیسرائیل و فەلەستینییەكان". هەروەها وتویەتی "هاوپەیمانیی ئاسایشی ئیقلیمیی پێشنیاركراو لە نێوان ویلایەتە یەكگرتووەكان و هاوپەیمانەكانی كەنداو و میسر و ئوردن، كراوەدەبێت لەبەردەم هەر لایەنێكدا كە بڕوای بە بنەما و پرەنسیپەكانی ئەو هاوپەیمانێتییە هەبێت". چاودێران دەڵێن ئەم وتانەی وەزیری دەرەوەی بەحرەین پێشوازیكردنێكی ناڕاستەوخۆی مەنامە-یە لە حكومەتی ئیسرائیل، بەتایبەت كە هاوكاتن لەگەڵ كۆتاییهاتنی سەردانەكەی سەرەك وەزیرانی ئیسرائیل بۆ عومان و دیدار و كۆبوونەوەكانی لەگەڵ سوڵتان قابوس-دا.

پێشتریش بنیامین نەتانیاهۆ سەرۆك وەزیرانی ئیسرائیل وتوویەتی "كردنەوەی دەروازەكان بەڕووی جیهانی عەرەبی و ئاساییكردنەوەی پەیوەندیەكانمان، هەنگاوێكی سەرەكیی دەبێت بۆ دۆزینەوەی دەرچەیەكی ئاشتەوایی و چەسپاندنی ئاشتی لەگەڵ فەلەستیندا".

 
ئامادەكردن: لوقمان محەمەد رەشید



  • ڕۆژ
  • هەفتە
  • مانگ
created by Avesta Group and powered by Microsoft Azure

بەپەلە