سەرۆکایەتی شارەوانی بناری قەندیل باری نائاسایی راگەیاند

هەواڵ / کوردستان :: 27/10/2018‌ :: 593‌ جار بینراوە

دواڕۆژ ، محەمەد مستەفا
بەهۆی ئەو زیانە زۆرەی لافاو گەیاندویەتی بە گوندەکانی بنار قەندیل، سەرۆکایەتی شارەوانی بنار قەندیل باری نائاسایی لە سنوری گوندەکانی بناری قەندیل ڕادەگەیەنێت و داوای بەهاناوەچوون و هاوکاری بەپەلەش دەکات بۆ دانیشتوانی ئه‌و گوندانه‌.

محەمەد حەسەن، هاوسەرۆکی شارەوانی بناری قەندیل بە دواڕۆژ-ی راگەیاند :"لافاوی ماوەی 24 کاتژمێری ڕابردوو زیانێکی زۆی مادی بە بەشێکی زۆری گودەکانی بناری قەندیل گەیاندووە، بۆیە لە ئێستادا ئەوان وەک شارەوانی گوندەکانی بناری قەندیل باری نائاسایی ڕادەگەیەنن".

وتیشی :"داواکارین لە حکومەتی عێراق و هەرێمی کوردستان ڕێکخراوە نێودەوڵەتی و ناوخۆییەکان کە بەهانای خەڵکی بناری قەندیل-ه‌وه‌ بێن، چونکە ڕێگای سەرەکی بناری قەندیل و بەشی زۆری گوندەکان گیراوە بەدەیان خانوو لەناوچوون نزیکەی 10 پرد زیانیان بەرکەوتووە تۆڕی کارەبای نیشتیمانی پچڕاوە چەند گوندێک تۆڕی ئاوی خواردنەوەیان خراپ بووە".

هاوسەرۆکی شارەوانی بناری قەندیل باسی لەوەشکرد :"چەندین قوتابخانە و مزگەوت و بنکەی تەندروستی زیانیان بەرکەوتووە بەسەدان دۆنم باخچەی هاوڵاتیان لەناوچوون ژمارەیەکی زۆر مێش هەنگ و ئاژەڵی هاوڵاتیان لەناوچوون، بۆیە داوای بەهاناوە هاتنی بەپەلە دەکەین بۆ ئاسایی کردنەوەی ئەم بارودۆخە".

هاوكات هه‌رئه‌مشه‌و هه‌ڤاڵ ئه‌بوبه‌كر، پارێزگارى سلێمانى له‌ راگه‌یه‌نراوێكدا كه‌ كۆپیه‌كى بۆ دواڕۆژ نێردراوه‌ كه‌مپینێكى تایبه‌تى بۆ به‌هاناوه‌چوونى هاوڵاتیانى ئه‌و گوندانه‌ راگه‌یاند و ئاماده‌ى خۆى بۆ به‌هاناوه‌چونیان دوپاتكرده‌وه‌.

ده‌قى راگه‌یه‌نراوه‌كه‌
پەیامێكی بەپەلە بۆ
بەهاناوەچوونی زیانلێكەوتووانی لافاوەكانی بناری قەندیل و دۆڵی شاورێ
بەهۆی بارانبارینی زۆرو لافاوی لەناكاوەوە، زیانێكی زۆر بەر گوندەكانی بناری قەندیل لە سنووری ناحیەی سەنگەسەرو گوندەكانی دۆڵی شاورێی سەر بە ناحیەی سەركەپكانی سنووری ڕانیە، كەوتوون، ئێمە وەك پارێزگای سلێمانی ئامادەین بۆ هەر هاوكاری و بەهاناوەچوون و هەماهەنگییەك لەگەڵ ئیدارەی سەربەخۆی راپەڕین و لایەنە پەیوەندیدارەكانی ترو هەر لێرەوە كەمپینێكی فریاگوزاریی و بەهاناوەچوون ڕادەگەیەنین، داوا لە حكومەتی هەرێمی كوردستان و حكومەتی ئیتیحادیی عێراق و ڕێكخراوە نێودەوڵەتی و ناوخۆییەكان‌و خەڵكی جوامێری كوردستان دەكەین، پشتیوانیی ئیدارەی ناوچەكە بكەن بۆ كەمكردنەوەی زیانەكان و بەهاناوەچوونی زیانلێكەوتووانی ئەم گوندانە، چاوەڕێی هیممەتی مەردانەی خێراو هەماهەنگیی لە هەموولایەك دەكەین.
 
د.هەڤاڵ ئەبوبەكر
پارێزگاری سلێمانی
26/10/2018



created by Avesta Group and powered by Microsoft Azure

بەپەلە