دوای یەکگرتوو حیزبێکی تر بوو بە ئۆپۆزسیۆن

هەواڵ / کوردستان :: 23/10/2018‌ :: 6816‌ جار بینراوە

دواڕۆژ، پشتیوان جەمال
بزووتنەوەی ئیسلامی پێشوازی لە ئۆپۆزسیۆنبوونی یەكگرتووی ئیسلامی دەكات و رایدەگەیەنن پێشتر رابەری حیزبەكەیان داوای لە ئەمینداری یەكگرتوو کردووە جگە لەئۆپۆزسیۆنبوون، بەشداری پەرلەمانیش نەكەن.


كامیل مەحمود، وتەبێژی بزووتنەوەی ئیسلامی لە لێدوانێكدا بۆ دواڕۆژ وتی: "پێشتریش رابەری حیزبەكەمان داوای لە سەڵاحەددین بەهادین، ئەمینداری گشتی یەكگرتوو كردووە، یەكگرتوو نەك هەر نەچنە نێو حكومەتەوە، بەڵكو بایكۆتی پەرلەمانی كوردستانیش بكەن، لەبەر ئەوەی یاریی بە دەنگەكانیان كراوە، ئێستاش كە یەكگرتوو بووەتە ئۆپۆزسیۆن، ئێمەش لەگەڵیانین و دەبینە ئۆپۆزسیۆن".

وتەبێژی بزووتنەوە وتیشی: "پێمانباشە ئەو هێزانەی خۆیان بەهێزی ناڕازی دەزانن بەشداری كابینەی داهاتووی حكومەتی هەرێم نەكەن، چونكە زۆرینەی كورسییەكانی پەرلەمان بەدەست ئەو دوو حیزبەوەیە، بۆیە لە رابردوودا چۆن بووە، لە داهاتووش هەروا دەبێت".

یەكگرتوو و بزووتنەوەی ئیسلامی لەنێو لیستی بەرەو ئیسڵاح بوون بۆ هەڵبژاردنی 30ی ئەیلولی پەرلەمانی كوردستان، بەڵام تەنها 84 هەزار دەنگیان بەدەستهێنا كە پێنج كورسی پەرلەمانییە و كورسییەكانیش بۆ یەكگرتوو بوون، بۆیە دوێنێش یەكگرتوو ئۆپۆزسیۆنبوونی خۆی راگەیاند.



created by Avesta Group and powered by Microsoft Azure