لەپارێزگایەک توندوتیژیی دژ بە ژنان زیادیکردووە

هەواڵ / کوردستان :: 24/10/2018‌ :: 1057‌ جار بینراوە

دواڕۆژ، عەلی حەمە سەعید
لێپرسراوی نوسینگەی بەرەنگاربوونەوەی توندوتیژی دژ بە ژنان لە سنوری پارێزگای هەڵەبجە و قەزاكانی سەیدسادق و شارەزوور و پێنجوێن ئاماژە بەوە دەكات: بە بەراورد بە ساڵی ڕابردوو، ڕێژەی ئەنجامدانی توندوتیژییەكان دژ بە ژنان %24 زیادیان كردووە، قەزای سەیدسادقیش زۆرترین توندوتیژی تیادا ئەنجام دراوە.

رائید بورهان ئەحمەد، لێپرسراوی نوسینگەی بەرەنگار بوونەوەی توندوتیژی دژ بە ژنان لە سنوری پارێزگای هەڵەبجە و قەزاكانی سەیدسادق و شارەزوور و پێنجوێن، بە دواڕۆژی ڕاگەیاند: بەهۆی بەردەوامی ئەو گرفتە سیاسی و ئابووری و كۆمەڵایەتییانەی كە لە هەرێمی كوردستان دەگوزەرێن حاڵەتەكانی توندوتیژی دژ بە ژنان لە سنورەكەدا ڕوویان لە زیاد بوون كردووە بە بەراورد بە ساڵی ڕابردوو لەم كاتەدا.

ئاماژەی بەوەشكرد: لە سەرەتای ئەمساڵەوە، لە هەر یەكە لە پارێزگای هەڵەبجە قەزای سەیدسادق و شارەزوور و پێنجوێن، نزیكەی 170 حاڵەتی توندوتیژی دژ بە ژنان تۆمار كراون، بە جۆرێك لە قەزای سەیدسادق 59 حاڵەت و قەزای شارەزوو 43 حاڵەت و قەزای پێنجوێن 35 حاڵەت و پارێزگای هەڵەبجەش 30 حاڵەتی توندوتیژی دژ بە ژنان تۆماركراون، بە بەراوردبە ساڵی ڕابردوو لەم كاتەدا ڕێژەكە %24 زیاتر بووە.

لێپرسراوی نوسینگەی بەرەنگار بوونەوەی توندوتیژی دژ بە ژنان لە سنوری پارێزگای هەڵەبجە و قەزاكانی سەیدسادق و شارەزوور و پێنجوێن، ئەوەشی خستەڕوو: لە لێكۆڵنەوەكانی زۆربەی دۆسییەكاندا بۆمان دەركەوتووە كە سەرچاوەی گرفتەكانی نێوان خێزانەكان زۆر جار بۆ لێكتێنەگەیشتنی نێوان هاوسەرەكان دەگەڕێتەوە بەجۆرێك لەسەرەتادا كێشەیەكی بچوكییان هەیە، بەڵام دواتر بەهۆی درێژەكێشانی ئەم كێشەیەوە، گرفتێكی گەورەتر دێتە ئاراوە تا كاردەگاتە كوشتن یان خۆكوشتن یاخود ئەنجامدانی توندوتیژی بەرامبەر بە یەكتری.



created by Avesta Group and powered by Microsoft Azure

بەپەلە