رۆژنامه‌كانى ئه‌مریكا: بن سەلمان ئاگاداری رووداوەكەی خاشقچی-یە

هەواڵ / ڕاپۆرت :: 17/10/2018‌ :: 372‌ جار بینراوە

تاگ :: جیهان

دواڕۆژ
میدیای خۆرئاوا، هێرشی توند دەكەنە سەر محەمەد بن سەلمان جێنشینی سعودیە و هەندێك لە نووسەرە دیارەكانی ئەمریكا راستەوخۆ ونبوونی جەمال خاشقچی رۆژنامەنووس و تێكچوونی دۆخی ئێستای سعودیەی دەخەنە ئەستۆ و لەوەیش زیاتر باس لە پێویستیی دوورخستنەوەی لە دەسەڵات دەكەن و تەنانەت كوشتنیشی بە دوور نازانن.

رۆژنامە بەناوبانگەكانی لە نموونەی واشنتۆن پۆست و نیویۆرك تایمز، هەڵمەتێكی فراوانیان لە دژی بن سەلمان دەستداوەتێ‌ و لەو بڕوایەدان دیارنەمان و (كوشتن)ی خاشقچی لە ئەستۆی بن سەلمان-دایە و بەبێ‌ ئاگاداری و رەزامەندیی ئەو كارێكی لەوجۆرە ناكرێت.

نیكۆلاس كریستۆف نووسەری ناوداری ئەمریكی دەڵێت:"محەمەد بن سەلمان جێنشینێكی شێتە، رۆژنامەنووسان دەكوژێت. سەرەك وەزیران دەڕفێنێت. ملیۆنەها منداڵ برسی دەكات. بۆیە هیچ شایان و شایستەی ئەوە نییە لە نێوەندە رەسمیەكاندا پێشوازیی لێ‌ بكرێت بەڵكو شوێنی شیاوی ئەو ژوورە تاریكەكانی ژێرزەمینی زیندانەكانە".

كریستۆف نووسیویەتی "زۆر بە راشكاوی، ئەوە مایەی شەرمە بۆ بەرپرسانی ئیدارەی ترەمپ و گەورە بزنسمان و بازرگانەكان كە چەپڵە بۆ بن سەلمان لێدەدەن، لەكاتێكدا ئەو دەیان بزنسمان و بازرگان و شازادەی لە بەندیخانەكان توند كردووە و سەعد حەریری سەرەك وەزیرانی لوبنانی رفاند و بەزۆر دەستی پێ‌ لەكاركێشایەوە. بەهەڵەشەیی خۆی قەیرانێكی لەگەڵ قەتەردا ناوەتەوە. جەنگی یەمەن-ی بەرپاكردووە كە بووەتە خراپترین قەیرانی مرۆیی لە جیهاندا و نزیكەی هەشت ملیۆن یەمەنیی خستووەتە لێواری لەبرسامردنەوە". "بۆیە دەكرێت ئەمریكا ئەوە بۆ خێزانی پاشایەتی سعودیە روون بكاتەوە كە پێویستە جێنشینێكی تازە بۆ دەسەڵاتی وڵاتەكەیان بدۆزنەوە".

لایخۆیەوە، جۆن برینان سەرۆكی پێشووی ئاژانسی هەواڵگریی ئەمریكا (CIA) بەراوردێكی خێرای كردووە لەنێوان ماوەی دەسەڵاتی محەمەد بن نایف جێنشینی پێشوو و محەمەد بن سەلمان-ی جێنشینی ئێستای سعودیەدا و دەڵێت"بەلابردنی بن نایف و هاتنی بن سەلمان، دەزگای ئەمنی سعودیە گەڕایەوە حاڵەتە رەش و خراپەكانی پێش دەسەڵاتی بن نایف و ناووناوبانگی قێزەون و ناشیرین بوو لە سایەی بن سەلمان-دا و كەوتەوە رفاندن و بێسەروشوێنكردنی رۆژنامەنووس و چالاكوانە سعودیەكان، هەموو ئەمانەیش لە ئەستۆ و لە بەرپرسیارێتیی جێنشینی ئێستادان".

رۆژنامەی بەناوبانگی فۆرین پۆلیسی-یش لە راپۆرتێكدا ئاماژەی بە ئەگەری لابردنی محەمەد بن سەلمان لە پۆستی جێنشینی سعودیە كردووە وەك كاردانەوەیەك بەرامبەر قەیرانەكەی جەمال خاشقچی.

برۆس ریدڵ، كە لە سەردەمەكانی جۆرج بوشی باوك-ەوە هەتا باراك ئۆباما، راوێژكاری هەرچوار سەرۆكەكەی ئەمریكا بووە، دەڵێت"هیچ مایەی سەرسوڕمانم نابێت ئەگەر بن سەلمان لە عەرشی دەسەڵات لاببرێت، یان بكوژرێت".

واشنتۆن پۆست-یش لە زاری گەورە دیپلۆماتێكی ئەمریكیەوە كە ساڵانێكی زۆر لە شانشینی عەرەبستانی سعودیە كاری دیپلۆماتیی كردووە و شارەزای دەسەڵات و ئیدارەدانی وڵاتەكەیە، نووسیویەتی "هەرگیز هەرگیز بەبێ‌ ئاگاداری و تەنانەت رەزامەندیی محەمەد بن سەلمان، رووداوی وەك ئەوەی جەمال خاشقچی نابێت و ناكرێت".

ئامادەكردن: لوقمان محەمەد رەشید



created by Avesta Group and powered by Microsoft Azure