دهۆك: نێزیكی هزار پارچه‌یێن شوونواری هاتینه‌ دیتن

هەواڵ / که‌لتور :: پێش 1 هەفتە ‌ :: 60‌ جار بینراوە

دواڕۆژ، بورهان یه‌حیا
رێڤه‌به‌رییا شوونوارێن پارێزگه‌ها دهۆك ب هه‌ڤكاری دگه‌ل تیمه‌كا بسپۆرێن ئیتالی نێزیكی هزار پارچه‌یێن شوونواری ل ره‌خودۆرێن گرێ (گومل) ل ده‌ڤه‌ردارییا شێخان دیتینه‌.

دكتۆر حه‌سه‌ن ئه‌حمه‌د رێڤه‌به‌رێ شوونوارێن پارێزگه‌ها دهۆك بۆ ده‌زگه‌هێن راگه‌هاندنێ دیاركر"تیمێن وان یێن رێڤه‌به‌ریێ ب هه‌ڤكاری دگه‌ل تیمه‌كا بسپۆرێن شوونواران یێن وه‌لاتێ ئیتالیا، بۆ ده‌مێ سێ مه‌هان لێگه‌ڕیان ل ره‌خودۆرێن گرێ گومل ل ناحیا كه‌له‌كچی ل ده‌ڤه‌ردارییا شێخان سه‌ر ب پارێزگه‌ها دهۆك كرییه‌ و شیاینه‌ ل ڤی جهێ كه‌ڤنار نێزیكی هزار پارچه‌یێن شوونواری ببینن".

دیاركر"مێژوویا به‌شه‌ك ژ وان شوونوارێن بۆ 4 هزار سالان به‌ری نوكه‌ دزڤرین و گه‌له‌ك تشتێ نوو بۆ مه‌ ژێ دیار بووینه و ل ڤێره‌ سۆپاسییا ده‌زگه‌هێن ئێمناهیێ و پێشمه‌رگه‌ی دكه‌ین كو شیاینه‌ ئه‌ڤ جهێن شوونواری یێن گرنگ بپارێزن‌".

پرۆفیسۆر دانیال موره‌ندی بسپۆرێ شوونواران یێ ئیتالی راگه‌هاند"ل سه‌ر ده‌مێ ئاشۆرییان گرێ گومل ناڤه‌كێ دی ل سه‌ر هه‌بوویه‌ ئه‌وژی (گم گاره‌) و ئه‌ڤ چه‌نده‌ لسه‌ر هنده‌ك به‌ران هاتییه‌ نڤیسین و دیار بوویه‌ ژلایێ پاشا سه‌نحاریب ڤه‌ هاتییه‌ ئاڤاكرن داكو ئاڤێ ژ ده‌ڤه‌را خنس ببه‌ته‌ نه‌ینه‌وا".

دیاركر"ل ڤی جهی شه‌ڕه‌كێ دیرۆكی و مه‌زن (شه‌ڕێ گوگه‌مل) ناڤبه‌را ئه‌سكه‌ندەری‌ مه‌قدونی و سه‌نحاریب دا روودایه‌ ل 331 به‌ری زایینی".

ئاماژه‌كر"هنده‌ك پارچه‌یێن شوونواری ژ كه‌رسته‌یێ برۆنزی ل ڤی جهی هاتینه‌ دیتن كو مێژوویا وان بۆ 4 بۆ 5 هزار سالان به‌ری نوكه‌ دزڤریت و چه‌ندین گۆڕ ژی هاتینه‌ دیتن كو تابیتێن وان ب ئاخێ هاتینه‌ چێكرن".



  • ڕۆژ
  • هەفتە
  • مانگ
created by Avesta Group and powered by Microsoft Azure