ئەنجومەنی پارێزگای کەرکوک داوایکرد دوو خاڵە گومرگییەکە هەڵبگیرێت

هەواڵ / کوردستان :: 09/10/2018‌ :: 242‌ جار بینراوە

دواڕۆژ، عیماد جەباری
کوتلەکانی ئەنجومەنی پارێزگای کەرکوک رێککەوتن کاتژمێر 10 ی بەیانی رۆژانی سێشەممەی هەموو هەفتەیەک کۆبوونەوەی راوێژکاری ئەنجومەنەکە رێکبخرێت و لەئەگەری تەواو بوونی رێژەی یاساییش، بەدانیشتینی یاسایی هەژماربکرێت.


ئەحمەد عەسکەری، ئەندامی دەستەی سەرۆکایەتی لیستی برایەتی بەدواڕۆژی وت: "لەدانیشتنەکەدا زۆرترین قسە لەسەر دوو خاڵە گومرگییەکە کرا و هەموو کوتلەکان کۆکبوون لەسەر ئەوەی بەنایاسایی دانراوە و بەشێوەیەکی هەڕەمەکییانە پارە وەردەگیرێت بەبێ رەچاوکردنی پێناسەی گومرگی و کەسیش نازانێت ئەو پارەیە دەچێتە گیرفانی کێوە".

وتیشی: "بەپێی مادەکانی 1، 3 و 8 ی یاسای گومرگی عێراقی بۆ ساڵی 1984ی هەموارکراو دانانی ئەو خاڵە گومرگییەی کەرکوک نایاساییە و داوامانکرد هەڵبگیرێت، چونکە ئەرکی سەرشانی هاووڵاتیانی قورس کردوە و تەنانەت لەکاتی گواستنەوەی کەلوپەلی نێو ماڵەکەی خۆشت گومرگت دەکەن".

سەبارەت بەپۆستەکانیش، عەسکەری وتی: "لەکۆبوونەوەکەدا باس لەپۆستەکان نەکرا، چونکە ئەو پرسە سەرەتا دەبێت لەنێو حزب و کوتلەکاندا رێککەوتنی لەسەر بکرێت کە کۆبوونەوەکان لەو بارەیەوە بەردەوامە و دواتر بهێنرێتە نێو ئەنجومەنەوە".



created by Avesta Group and powered by Microsoft Azure