كۆمسیۆن بڕیاری نوێی لەبارەی دەنگدانەوە دەرکرد

هەواڵ / کوردستان :: 29/09/2018‌ :: 15017‌ جار بینراوە

دواڕۆژ، ئاوارە حەمید
كۆمسیۆنی باڵای سەربەخۆی هەڵبژاردن و راپرسی هەرێم گۆڕانكاری لە پێداویستییەكانی دەنگدان دەكات و دەنگدەر دەبێت لەکاتی دەنگدان بە رەگەزنامە، ناسنامەی باری شارستانیشی پێبێت، ئەوکاتە رێگەدەدرێت دەنگبدات.

شێروان زرار، وتەبێژی ئەنجومەنی كۆمسیاران لە كۆنگرەیەكی رۆژنامەوانیدا رایگەیاند: "كۆمسیۆن بڕیاریدا كە پێویستە دەنگدەر رەگەزنامەی عێراقی و ناسنامەی باری شارستانی  بەیەكەوە پێبێت، یاخود پاسپۆرت یان كارتی نیشتمانی پێبێت ئینجا دەتوانێت دەنگبدات".

وتیشی: "بریكاری قەوارە سیاسییەكان مافی وەرگرتنی بەڵگەنامەی هەیە لەدەنگدەر و دەشتوانێت وێنەی بەڵگەنامەکە بگرێت بە كامێرا یان مۆبایل".

ئاماژەی بەوەشدا: كە چوونە ژوورەوەی سەرباز بۆ ناو بنكەی دەنگدان قەدەغەیە و ئەگەر هێزی ئەمنی بچێتەژورەوە ئەوا دەنگی ئەو بنكەیە پوچەڵدەكرێتەوە.

لە بەشێكی تری كۆنگرە رۆژنامەوانییەکەدا باسی لەوەشكرد: كە لە هەر بنكەیەكی دەنگدان كەسێك لە دەنگدانی تایبەت دەنگی دابێت و لە دەنگدانی گشتی دەنگبداتەوە، ئەوا ئەنجامەکانی ئەو بنكەیە رەتدەكرێتەوە.

لە كۆتایی كۆنگرە رۆژنامەوانییەكەدا باسی لەوەشكرد: كە فەرمانبەری كۆمسیۆن مافی ئەوەی هەیە كە دڵنیایی لە پەنجەی دەنگدەر بكات بۆ زانینی بەكارهێنانی هەر جۆرە ماددەیەك.

بڕیارە سبەی 30ی ئەیلول هەڵبژاردنی خولی پێنجەمی پەرلەمانی كوردستان بەڕێوەبچێت.



created by Avesta Group and powered by Microsoft Azure