سنوری مەخمور بۆردومان دەکرێت

هەواڵ / کوردستان :: 27/09/2018‌ :: 1761‌ جار بینراوە

دواڕۆژ، هانا چۆمانی 
لە شەوی رابردووه‌وه‌ تاوەکو کاتژمێر 2:00ی دوای نیوەڕۆی ئەمڕۆ پێنجشەممە فرۆکە جەنگییەکانی هاوپەیمانان دەیان ناوچەیان لە سنوری مەخمور و چیای قەرەچوغ‌‌ بۆردومان کردووە، بەرپرسی کۆمیتەی مەخموریش دەڵێت: "بۆردوومانەکە بەردەوام دەبێت بۆ سەر بارەگاکانی داعش".

رەشاد گەڵاڵی، بەرپرسی کۆمیتەی مەخموری یەکیتیی نیشتمانیی کوردستان، بە دواڕۆژی راگەیاند: ماوەی نزیکەی 15 کاتژمێرە بەردەوام فرۆکە جەنگییەکانی هاوپەیمانان سنوری قەزای مەخمور و چیای قەرەچوغ بۆردەمان دەکەن لەگەڵ ژمارەیەک گوند و ناوچە کە گومان هەیە بارەگاکانی داعشی لیبێت و خۆیان لێی حەشار دبێت.

وتیشی: "فرۆکەکان دەیان بنکەو بارەگای داعش و تیرۆریستان و پاشماوەکانیان بۆردومان کردوە، نیوەڕۆی ئەمڕۆ ژمارەیەک موشەکیان ئاراستەی بنکەو بارەگاکانی داعش کرد لە دەوروبەری گوندی عه‌لیەرەش لە زنجیرە چیای قەرەچوغ".

هێمای بۆ ئەوەشکرد: نیوەڕۆی ئەمڕۆ هێزێکی زۆری سوپای عێراقی هاتووه‌تە گوندی عەلیە رەش و نیازی ئۆپەراسیۆنیان هەیە و زیاتر لە 50 ئۆتۆمبێل و هەمەری سەربازی و چەکی قورس دەبن، دەیانەوێت بە یەکجاریی ئەو ناوچانە لە پاشماوەی داعش پاکبکەنەوە و فرۆکە جەنگییەکانی هاوپەیمانانیش هاوکارییان دەکەن".



created by Avesta Group and powered by Microsoft Azure