رێڤه‌به‌رێ دارستانان: ب چ ره‌نگه‌كى مۆله‌ت بۆ بڕینا داران ناهێته‌دان

هەواڵ / کوردستان :: 24/09/2018‌ :: 151‌ جار بینراوە

دواڕۆژ، بورهان یه‌حیا
رێڤه‌به‌رێ دارستان و پاوانان ل پارێزگه‌ها دهۆك راگه‌هاند؛ دگه‌ل هه‌موو ده‌ڤه‌رداریێن سنۆرێ پارێزگه‌هێ رێككه‌ڤتینه‌ كو ب چ ره‌نگه‌كى مۆله‌تا داڕبرینێ نه‌ده‌ینه‌ چ كه‌سه‌كى.

فارۆق یووسف، رێڤه‌به‌رێ دارستان و پاوانان ل پارێزگه‌ها دهۆك بۆ دواڕۆژ رۆهنكر: "پێشتر و ب رێكا ده‌ڤه‌ردارییان مۆله‌تا بڕینا داران بۆ چه‌ند كه‌سان بۆ كارێن تایبه‌ت و گرنگ دهاته‌دان لێ ئه‌ڤ ساله‌ وه‌كو رێڤه‌به‌رییا دارستان و پاوانان دگه‌ل هه‌موو ده‌ڤه‌رداریێن سه‌ر ب پارێزگه‌هێ رێككه‌ڤتینه‌ كو ب چ ره‌نگه‌كى مۆله‌تا بڕینا داران بۆ چكه‌س و لایه‌نه‌كى بۆ هه‌ر كاره‌ك و مه‌ره‌مه‌كێ بیت نه‌هێته‌دان".

دیاركر: "ب ڤى ره‌نگى هه‌ر كه‌سه‌ك ل هه‌ر جهه‌كى بهێته‌ دیتن كو یێ داران دبڕیت ئه‌وى مۆله‌ت نینه‌ و یێ سه‌رپێچییا یاسایێ دكه‌ت و پێدڤییه‌ بهێته‌ ده‌سته‌سه‌ركرن".

فارۆق ئاماژه‌كر "ب دووماهى هاتنا شه‌ڕێ داعش بوویه‌ ئه‌گه‌رێ هندێ كو پێشمه‌رگه‌یێن پاراستنا ژینگه‌هێ دووباره‌ ڤه‌گه‌رنه‌ ئه‌ركێ خۆ یێ به‌رێ و ئه‌ڤه‌ دێ بیته‌ هاریكارییه‌ك بۆ پاراستنا ژینگه‌هێ و پێدڤییه‌ ب رژدى رۆلێ خۆ بگێرن".

رێڤه‌به‌رێ فه‌رمانگه‌ها ژینگه‌ها دهۆك محه‌مه‌د تاهر بریفكانى بۆ دواڕۆژ رۆهنكر: "هه‌ر ل ده‌ستپێكا شه‌ڕێ داعش هه‌موو ئه‌و پێشمه‌رگه‌یێن پاراستنا ژینگه‌هێ چۆبوونه‌ به‌رۆكێن شه‌ڕى و به‌ره‌ڤانى ژ هه‌رێمێ دكر و ژبه‌ر ڤێ ژى رێژه‌یا نێچیرێ و تاوانێن به‌رامبه‌ر ژینگه‌هێ پتر لێهاتبوو، لێ پشتى ب دووماهى هاتنا شه‌ڕێ داعش نوكه‌ پترى 1200 پێشمه‌رگه‌یێن ژینگه‌هێ دووباره‌ زڤرینه‌ سه‌ر ئه‌ركێن خۆ لێ ژبه‌ر چه‌ندین كێماسییان نه‌شێن ب دروستاهى ئه‌ركێن خۆ بجهبینن".

خویاكر: "پێشمه‌رگه‌یێن ژینگه‌هێ داخواز دكه‌ن كابینه‌یێن پڕى خزمه‌تگوزارى بۆ وان بهێنه‌ دابینكرن و كاره‌ب و ئاڤ تێدا هه‌بن بۆ هندێ بشێن ل جهێن دوور ده‌ست ل چیا و ده‌شتان چاڤدێرییا ژینگه‌هێ بكه‌ن و سه‌رپێچكاران ده‌ست نیشان بكه‌ن و راده‌ستى دادگه‌هێ بكه‌ن،لێ نوكه‌ ئه‌ڤ كابینه‌ نینن و ب هیڤییا خیڤه‌تان ژى كار ب رێڤه‌ ناچیت و ره‌وا ژى نینه‌ پێشمه‌رگه‌ لبن خیڤه‌تان بن".



created by Avesta Group and powered by Microsoft Azure