ژمارەیەک ژنی ئێزدی لەلایەن شەڕڤانانەوە رزگارکران

هەواڵ / کوردستان :: 18/09/2018‌ :: 306‌ جار بینراوە

دواڕۆژ، رەڤەند گوھەرزی
وتەبێژی یەکینەکانی پاراستنی گەل یەپەگە راگەیاند: ئەمڕۆ یەکینەیەکی تایبەتی شەڕڤانەکانمان توانیان دوو ژنی ئێزدی لە دەستی چەکدارانی داعش رزگار بکەن کە لە ساڵی ٢٠١٤ لە شەنگال رفێندرابوون.


نوری مەحمود، وتەبێژی یەکینەکانی پاراستنی گەل (یەپەگە) بە دواڕۆژی راگەیاند: ئەمڕۆ سێشەممە ١٨ی ئەیلولی ٢٠١٨ پاش چوار ساڵ لە رفاندنیان، دوو ژنی ئێزدی لە دەستی داعش رزگارکراون.

وتیشی: "ئەو دوو ژنە ئێزدییە بەناوەکانی (ئیناس رەشۆ) ١٢ ساڵ خەڵکی کومەڵگای خانسۆر و (مەلکو خزر کوتی) تەمەن ٤٠ ساڵ خەڵکی گوندی کوچۆ، لە دەستی داعش رزگارکراون".

حسێن کورو قائیدی، بەڕێوەبەری نوسینگەی رزگارکردنی رفێندراوانی ئێزدی لە دەستی داعش رایگەیاند: دوای دەستنیشانکردنی شوێنەکەی، بە ھەوڵ و ماندووبوونێکی زۆر تیمەکانی نووسینگەکەمان توانییان ژنێک بەناوی (لازمە خەیر) تەمەن ٢٤ ساڵ خەڵکی گوندی حەردان لە سوریا لەدەستی داعش رزگار بکەن.

بەوتەی قائیدی، لە کۆی ٦٤١٧ کەس، نوسینگەکەیان تائێستا ٣٣٣١ کەسیان لە رفێندراوانی دەستی داعش رزگار کردووەو ھەوڵەکانیان بەردەوامن بۆ رزگارکردنی ئەوانەی ماون.



created by Avesta Group and powered by Microsoft Azure