وردەکاری کۆبوونەوەکەی پارێزگاری کاتی کەرکوک لەگەڵ نوێنەری پێکهاتەکان

هەواڵ / کوردستان :: 18/09/2018‌ :: 733‌ جار بینراوە

دواڕۆژ، عیماد جەباری
پارێزگاری کاتی کەرکوک لەگەڵ نوێنەری پێکهاتەکانی عەرەب، کورد و تورکمان لەئەنجومەنی پارێزگاكه‌ کۆبۆوە و ئه‌ندامێكى ئه‌نجومه‌نه‌كه‌ش باس له‌ ناوه‌رۆكه‌كه‌ى ده‌كات.


ئەمڕۆ سێشەممە 18ی ئەیلول راکان سەعید جبووری پارێزگاری کاتی کەرکوک لەگەڵ نوێنەری پێکهاتەکانی عەرەب، کورد و تورکمان لەئەنجومەنی پارێزگای کەرکوک کۆبۆوە.

نەجات حسێن، ئەندامی کوتلەی تورکمان لە ئەنجومەنی پارێزگا بە دواڕۆژی وت: لە کۆبوونەوەکەدا بڕیارێکی ئەنجومەنی وەزیرانی عێراق تاووتوێکرا سەبارەت بە پەیڕەوکردنی هاوسەنگی پێکهاتەکان لە بەڕێوەبردنی دامودەزگاکانی کەرکوک بەڕێژەی 32 لەسەدا بۆ هەر پێکهاتەیەک.

وتیشی: "بەپێی بڕیارەکە داواکراوە ئیدارە و ئەنجومەنی پارێزگا لیژنەیەکی هاوبەش پێکبهێنن بۆ دابەشکردنی پۆستەکان لەنێوان یەکتردا بەشێوەیەکی هاوسەنگ".

ئەندامەکەی کوتلەی تەرکمانی ئەوەشی وت: "ئێمە و عەرەب ئامادەییمان دەربڕی بۆ بەشداری لە لیژنەکە و جێبەجێکردنی پڕۆسەکە، بەڵام لایەنی کوردی تێبینییان هەبوو، چونکە ئەوان داوادەکەن نەک تەنها پۆستەکان، بەڵکو تەواوی فەرمانبەری فەرمانگەکانیش بکرێنە رێژەی 32 لەسەدا کە ئەمە کارێکی قورسە".

نەجات حسێن راشیگەیاند: لایەنی کوردی داوایانکردووە تا رۆژی یەکشەممەی داهاتوو مۆڵەتیان پێبدرێت بۆ ئەوەی لەگەڵ سەرکردایەتی حزبەکانیاندا قسە بکەن و وەڵام بدەنەوە.

دواڕۆژ بۆ وەرگرتنی زانیاری لە ئەندامانی لیستی برایەتی، پەیوەندی کرد بە (ئەحمەد عەسکەری)، (کاکەڕەش سدیق)، (جواد جەنابی) و (ئیبراهیم خەلیل)، بەڵام بەبیانووی جیاواز ئامادەنەبوون لێدوان بدەن.



created by Avesta Group and powered by Microsoft Azure