کەرکوک: لەڕێگەی گولە هاوەنەوە هێرشکرایە سەر تەلوەرد

هەواڵ / کوردستان :: 07/09/2018‌ :: 779‌ جار بینراوە

دواڕۆژ، عیماد جەباری
بەرەبەیانی ئەمڕۆ 7ی ئەیلولی 2018 چەکدارانی داعش ناوچەی تەلوەردیان لەباشوری کەرکوک هاوەن باران کرد.

راگەیاندنی جەنگی هێزی ئیمامەین لەڕاگەیەنراوێکدا کە بۆ دواڕۆژی ناردووە رایگەیاندوە: چوار گولە هاوەن ئاڕاستەی هێزەکانمان کراوە لەناوچەی تەلوەرد (25 کیلۆمەتر باشوری کەرکوک)، بەڵام هیچ زیانێکی گیانی لێنەکەوتوەتەوە.

هەر لەو راگەیەنراوەدا ئاماژەی بۆ ئەوەکردووە: کە چەکدارانی داعش لەڕێگەی فڕۆکەی بێفڕۆکەوانەوە چاودێری ئەو ناوچەیەیان کردووە کە هێزەکانمانی لێیە و دوای ئاشکرابونیشی تەقەی لێکراوە و چارەسەر کراوە.

دوو شەو پێش ئێستایش لەنزیک ناحیەی مولتەقا لەسەر رێگەی کەرکوک - حەویجە لەلایەن هێزێکی داعشەوە هێرشکرایە سەر سەنگەرەکانی هێزی ئیمامەین و دوای بەرپەرچدانەوەیان هێرشەکە تێکشکێنرا.

ئەم دوو هێرشەی چەکدارانی داعش لەکاتێکدایە کە ماوەیەک بوو ئەو گروپە تیرۆریستییە چالاکییەکانیان لەو سنورە نەمابوو، بەڵام جارێکیتر دەستیانکردوەتەوە بەجموجۆڵ و هێرشدەکەنەسەر هێزە سەربازییەکان.

هێزی ئیمامەین سەر بەمەرجەعییەتی نەجەفە، هیچ پەیوەندییەکیشی بە دەستەی حەشدی شەعبییەوە نییە و ئەرکی بەرپرسیارێتی بەشێک لەناوچەکانی پشتوێنەی باشوری کەرکوکیان لەئەستۆدایە.



created by Avesta Group and powered by Microsoft Azure