پارێزگارێ دهۆك و وه‌لاتى رێككه‌ڤتن قوتابخانا ئه‌مریكى ژ ئاڤاهیه‌كێ حكومه‌تێ ده‌ركه‌ڤه‌یت

هەواڵ / کوردستان :: 07/09/2018‌ :: 1852‌ جار بینراوە

تاگ :: دهۆك

دواڕۆژ، دهۆك
پارێزگارێ دهۆك و نوونه‌رێن تاخێ سێگركا رێككه‌ڤتن ئاڤاهیێ حكومه‌تێ یێ قوتابخانه‌یێن ئاماده‌ییان ئامه‌د و ناڤنجییا ناز پشتى ساله‌كادى ژ (قوتابخانه‌یا ئه‌مریكى یا نێڤده‌وله‌تى- دهۆك) بهێته‌ وه‌رگرتن.


ئه‌ڤ قوتابخانه‌ سالا 1987-1988 ل تاخێ سێگركا هاتبوو‌ دامه‌زراندن، به‌رى دوو سالان كۆمپانییا UB) Holding) لسه‌ر حیسابا خوه‌ نووژه‌نكر، پشتى نووژه‌نكرنێ رێڤه‌به‌ریا گشتییا په‌روه‌رده‌یا دهۆك ئه‌و ئاڤاهى راده‌ستى (قوتابخانه‌یا ئه‌مریكى یا نێڤده‌وله‌تى-دهۆك) كر، ڤێ چه‌ندێ ژى نه‌رازیبوونا قوتابییان و خه‌لكێ تاخێ سێگركا لدووڤ خوه‌ ئینا.

توفیق بامه‌رنى، ئێك ژ نوونه‌ر‌ێن قوتابیێن قۆتابخانه‌یێن ئامه‌د و ناز بۆ دواڕۆژ گۆت :"پێنجشه‌مبى 6-ێ ئه‌یلۆلێ فه‌رهاد ئه‌مین پارێزگارێ دهۆك و عومه‌ر عه‌لى رێڤه‌به‌رێ گشتیێ په‌روه‌رده‌یا دهۆك دگه‌ل نوونه‌رێن قوتابیێن قۆتابخانه‌یێن ئامه‌د و ناز كۆمبوون و سۆزدان سالا بهێت 2019-2020-  قۆتابخانه‌یا ئه‌مریكى ژ ئاڤاهیێ قوتابخانه‌یێن ئامه‌د و ناز ده‌ركه‌ڤیت".

ناڤبۆرى خوه‌یاكر :"پارێزگارێ دهۆك داخواز لێبۆرینێ ژوان كر و راگه‌هاند: ئه‌ڤ ساله‌ قوتابخانه‌یا ئه‌مریكى دێ ئاڤاهیه‌كێ نوو بخوه‌ چێكه‌ت و سالا بهێت دێ چنه‌ ئاڤاهیێ خوه‌ و ئاڤاهیێ به‌رێ دێ بۆ قوتابخانه‌یێن ئامه‌د و ناز مینیت".

ل گۆر زانیاریێن دواڕۆژ د كۆمبوونا پێنجشەمدا په‌روه‌رده‌یا دهۆك رازیبوو كو ئاڤاهیه‌كى ل به‌رامبه‌ر رێڤه‌به‌ریا گشتییا په‌روه‌رده‌یا دهۆك بۆ قوتابیێن قوتابخانه‌یێن ئامه‌د و ناز بۆ سالا 2018-2019 ده‌ستنیشان بكه‌ن، پارێزگار ژى رازیبوو  قوتابیێن ئامه‌د و ناز لسه‌ر حیسابا پارێزگه‌ها دهۆك ب پاسان بۆ وێ قۆتابخانێ بهێنه‌ ڤه‌گۆهاستن كو زێده‌تر ژ 1000 قوتابیانه‌.



created by Avesta Group and powered by Microsoft Azure