بۆ یەکەمجار کۆمسیۆن لەسەر کەژاوەی ئۆتۆمبێلی بانگەشە بڕیار دەدات

هەواڵ / کوردستان :: 05/09/2018‌ :: 1008‌ جار بینراوە

دواڕۆژ، هانا چۆمانی 
بەڕێوەبەری ئۆفیسی هەولێری کۆمسیۆن رایدەگەیەنێت "وەک رێنمایی یاساکانی بانگەشە ئەمساڵ جیاواز لەهەڵبژاردنەکانی رابردوو، دوو بڕیارمان دەرکردووە تایبەتە بە کەژاوەی ئۆتۆمبێل بۆ بانگەشە".


ئارام نەجمەدین، بەڕێوەبەری ئۆفیسی هەولێری کۆمسیۆنی باڵای سەربەخۆی هەڵبژاردن و راپرسی هەرێمی کوردستان بە دواڕۆژی راگەیاند "ئەمساڵ بۆ یەکەمجار دوو بڕیار دراوە تایبەت بەبانگەشە لەڕێگەی کەژاوەی ئۆتۆمبێلی لایەنە سیاسییەکان، بۆ یەکەمجاریش ئەوە توانرا بخرێتە چوارچێوەی یاسا و رێنمایی کۆمسیۆن و سزای توندی لایەنە سیاسییەکان و کاندیدەکانی لەسەر دەبێت".

وتیشی "نابێت هیچ لایەنێکی سیاسی یان کیانێک یان کاندیدێک لەڕێی کەژاوەی ئۆتۆمبیل شەقامە سەرکییەکان بگرێت، کە ئەوە سزای لەسەرە و ناشبێت کەژاوەی ئۆتۆمبێل دوای ١١ی شەو بەکۆڵان و گەڕەکەکاندا بڕوات و خەڵک بێزار بکات، کە بەهەمانشێوە ئەوەش سزای لەسەرە".

رونیشکردەوە، جاری یەکەم سزای ئاسایی دەدرێن و ئاگاداردەکرێنەوە، بۆ جاری دووەمیش سزاکە ماددی و مەعنەوی دەبێت.

ئەوەشی خستەڕوو، شەقامە سەرەکییەکانی هاتووچۆی هاووڵاتیان نابێت بەکاربێن بۆ کاروانی کەژاوەی ئۆتۆمبێلی بانگەشە، چونکە هاووڵاتیان لە هەڵبژاردنەکانی رابردوو سکاڵا و ناڕەزایەتییان هەبووە لەوەی لەلایەن کاروانی کەژاوەی بانگەشەی لایەنە سیاسییەکان بیزارکراون و رێگەیان گیراوە، جگە لەوەی رووداوی دڵتەزێنیشی لێکەوتووەتەوە".



created by Avesta Group and powered by Microsoft Azure

بەپەلە