بەرکەوتوویەکی تری چەکی کیمیایی گیانی لەدەستدا

هەواڵ / کوردستان :: 01/09/2018‌ :: 678‌ جار بینراوە

دواڕۆژ، عەلی حەمەسەعید
بەهۆی مانەوەی کاریگەری چەکی کیمیایی لەسەر جەستەی، ئێوارەی ئەمڕۆ یەکێکی تر لە بەرکەوتووانی چەکی کیمیایی هەڵەبجە لە تەمەنی 55 ساڵیدا گیانی لەدەستدا و تائێستاش 105 بەرکەوتووی چەکی کیمیایی گیانیان لەدەستداوە.


لوقمان عەبدولقادر، سەرۆکی کۆمەڵەی قوربانیانی کیمیابارانی هەڵەبجە بە دواڕۆژی ڕاگەیاند لە درێژەی گیانلەدەستدانی بەرکەوتووانی چەکی کیمیایی هەڵەبجە، ئەمڕۆش یەکێکی تر لە بەرکەوتووانی چەکی کیمیایی بەناوی (فوئاد حەمە فەرەج) بەهۆی مانەوەی کاریگەری چەکی کیمیایی لەسەرجەستەی لە وڵاتی دانیمارک کۆچی دوایکرد.

ئاماژەی بەوەشکرد،ئەو بەرکەوتووەی ئەمڕۆ گیانی لەدەستدا خاوەنی ژمارەیەک لە شەهیدانی کیمیابارانی هەڵەبجەیەو  لە دوای ساڵی 2003 وە تا ئێستاش 105 بەرکەوتووی چەکی کیمیایی هەڵەبجە گیانیان لەدەستداوە، هاوکات زۆربەی بەرکەوتووانی  چەکی پێویستییان بەچارەسەری بەردەوام هەیە.

سەرۆکی کۆمەڵەی قوربانیانی کیمیابارانی هەڵەبجە ئەوەشی وت، تا ئێستا زیاتر لە هەزار هاوڵاتی هەڵەبجە وەک بەرکەوتووی چەکی کیمیایی ناویان تۆمارکراوە، بە سەدان بەرکەوتووی چەکی کیمیایش لە دۆخێکی تەندروستی ناجێگیردان بەهۆی ئەوەی ماوەی زیاد لە سێ ساڵە هیچ بەرکەوتوویەکی چەکی کیمیایی ڕەوانەی دەرەوە نەکراون بۆ وەرگرتنی چارەسەر.



created by Avesta Group and powered by Microsoft Azure

بەپەلە