دەربارەی 31ی ئاب

هەواڵ / چاوی تۆ :: 01/09/2018‌ :: 435‌ جار بینراوە

هۆشیار عەزیز
3١ی ئاب لاپەرەیەکی خوێناوی و ناشیرینی ناو کتێبێکی گەورەو ناشیرینی شەڕی برا کوژیە..
ئەم مێژوە وەک چۆن بۆ یەکێتی ئەوکات (گۆران و یەکێتی ئێستا) شکستێکی گەورەو ساتەوەختێکی تاڵ و ناخۆش بوو, بۆ پارتیش ئەگەرچی سەرکەوتنێکی گەورەبوو بەڵام ساتەوەختێکی تاڵ و ناخۆش بوو، ھیچ پارتیەک بەسەرکەوتنەکانی لەشەری ناوخۆدا خۆشحاڵ نەدەبوو ئەوەندەی دڵ پر خەم و ئازار دەبوو, ئاخر چونکە ھیچ سەرکەوتنێک لەو سەرکەوتنە تاڵ و ناخۆشتر نیە کەبەسەر براو کەسی خۆتدا بێت، ئەو ساتەوەختانە ساتەوەختێک بون کە براکان جەستەی یەکتریان شەڵاڵی خوێن کردبو، شەقام و کوچەو کۆڵان و شاخ و دۆڵ و گردۆڵکەکانیان بە خوێنی یەکتر سور کردبو، سەدان دایک و باوک جەرگ سوتاو بون و سەدان ژنی روسور بێوەژن و ڕەشپۆش کەوتن و ھەزاران منداڵی کچ و کوڕ ھەتیو و بێ ناز کەوتن، چرای سەدان ماڵ بۆ هەتا هەتایە کوژایە و خەونی هەزاران کەس بۆ هەتاهەتایە لە گۆڕ نرا، ئەم مێژوە (کۆی ڕۆژ و مانگ و ساڵەکانی شەڕی برا کوژی دەڵێم هەر ٣١ی ئاب ناڵێم) دەبێت بە جۆرێک لە یادەوەریماندا بمێنێتەوە تا هەمیشە ترسمان لە دوبارە بونەوەی هەبێت و ئەو ترسەش رێگر بێت لە دوبارە بونەوەی نەک بەو جۆرە لە یادەوەریماندا بمێنێتەوە کە شەری دەرونی یەکتری پێ بکەین، ئێمە نەتەوەیەکی بریندارین، لەهەزار لاوە بریندار بوین و خوێنمان جۆگەلەی بەستوە، لە دوای ئەو مێژوەشەوە ئێمە برینی زۆر قوڵتر لەجەستەمان کراوە و خوێنی زۆرمان لێ رۆشتوە و ئازاری زۆرمان چەشتوە و تا ئێستاش بەو برین و ئازارانەوە دەتلێینەوە، شەری داعش و قەتڵ و عامی خوشک و برا یەزیدیەکانمان وشەهید و بریندار بونی هەزاران پێشمەرگەو ئاسایش و بەرگریکار لەم خاکە و هێرشی حەشدی شەعبی و داگیرکردنی لەسەدا پەنجای کوردستان و ژێردەستە بونەوەی سەدان هەزار کورد کە زیاتر لە ١٤ ساڵ بو هەوای ئازادیان هەڵدەمژی نمونەی نزیک و بەرچاون .. 

ھەر بۆیە ئەوانەی بەناوی دڵسۆزی و کورد و کوردستانخوازیەوە ئاور بۆ رابردوو دەدەنەوەو تەماشای لاپەرەناشیرینەکانی رابردوو دەکەن و بەحساب دەست دەخەنە سەر برینەکان دەبێت تەماشای ھەموو لاپەرەکانی ئەو کتێبە ناشیرینە بکەن و دەست بخەنەسەر ھەموو برینەکان نەک تەنھا زووم بکەنە سەر لاپەرەیەک و دەست بخەنەسەر تەنھا برینێک, چونکە کاتێک تەنھا زووم دەکەنە سەر لاپەرەیەک و قسەکانیان کورت دەکەنەوە لەسەر لاپەرەیەک و خۆیان لەلاپەرەکانی دیکە دەبوێرن ئەوە جگە لەھەوڵدان و خۆ ماندو کردن بۆ کولاندنەوەی برینەکان و ئازاردانی ھەستی قوربانیان و زیان لێکەوتوانی ئەومێژوە تاڵە ھیچی تریان لەنیەتدا نیە, کەئەمەش قێزەون تریین و پیستریین جۆری نیەتە کە لەم بارو دۆخ و سەردەمەدا کەسێک یان لایەنێک ھەیبێت, نیەتی کولاندنەوەو ئازاردانی رۆح و ھەستی ھەزاران ئینسانی بریندار و زیانباری ئەم وڵاتە چی پێ دەوترێت جگە لە نەخۆشی و رقێکی کوشندە و کوێری خەڵکانێک کەلەئازاردان و بریندارکردنی ئەوانی دیکە چێژ دەبین، ئەوانەی ئایندەو ئاسودەیی و ئاشتی و ئاوەدانی خوازن بۆ ئەم وڵاتەو خەڵکەکەی ئەبێت ھەوڵ بدەن و داوا بکەن کە ٣١ی ئاب و ھەموو لاپەرە خوێناوی و بریناوی و ئازاراویە ناشیرینەکانی دیکەی پیش و دوای ٣١ی ئاب وەک کتێبێکی ناشیرین بپێچرێنەوەو دابخرێن، داوابکەن و ھەوڵ بدەن کە ئیتر بۆھەتاھەتایە لاپەرەو کتێبی ناشیرینی لەم شێوەیە و مێژووی ئەم میللەت و وڵاتە بە پێنوسی ناشیرینی شەری براکان نەنوسرێتەوە...
 
هێشتا ساتەوەختە مەترسیدار و چارەنوس سازەکان لە پێشمانەوەن، بەجێمان نەهێشتون، هێشتا چەقۆی دوژمنەکان لەسەر گەردن و ملمان دور نەکەوتۆتەوە تا بەو خوێن ساردی و دڵساردی و دەرون گەرمیە پەلاماری یەک بدەین و یەکتر لەهەزار لاوە بریندار بکەین، ئێمە دەبێت لە جیاتی کولاندنەوەی برینی دەیان ساڵ پێش ئێستا پێویستە زەمینەی رۆحی و دەرونی ساز بکەین بۆ ئاشت بونەوە و باوەش بەیەکدا کردن و بڕین و تێپەڕاندنی رێگا سەختەکەی چارەنوس کە رەنگە چەند رۆژ یان مانگی تر دەست پێ بکات..

ئێمە دەبێت برینەکانی جەستەی یەکتر سارێژ بکەین و چیتر واز لە هەڵدانەوەی قەتماغە وکولاندنەوەی برینەکانی یەکتر بهێنین  ..
...
دوو تێبینی؛ 
 #خۆم لەهەمو کەس بە پارتی تر ئەزانم کەس موزایەدەی پارتایەتیم لەسەر نەکات و شەرحی فەلەسەفەی ٣١ی ئابم بۆ نەکات، من ئاوا سەیری ئەم رۆژە دەکەم تۆیش کەیفی خۆتە، ٣١ی ئاب لای من نە خیانەتە، نە جەژنە، نە جێ ی شانازیە، رۆژێکی خوێناوی ناو ڕۆژە خوێناویەکانی شەڕی براکوژیە و هیچی تر. 

#  من دوو جار لە شەری براکوژیدا بە سەختی بریندار بوم، بۆیە ئازاری شەری براکوژی تا ئێستاش لە ناو ئێسک و دەمارەکانم و سەرمدایە و پارچەیەکیش تا ئێستا لە نزیکی دڵمەوە جێ نشینەو ساڵانە چەند جارێک مەرگم لێ نزیک دەکاتەوە، بۆیە کاتێک دەڵێم ئازاری شەری براکوژی خۆم چەشتومەو دەزانم دەڵێم چی ..



  • ڕۆژ
  • هەفتە
  • مانگ
created by Avesta Group and powered by Microsoft Azure