پاسدارێكی ئێرانی منداڵێكی ونبووی هەڵەبجەی دۆزیوه‌ته‌وه‌و له‌گه‌ڵ خۆیدا بردوویه‌تی

هەواڵ / کوردستان :: 19/08/2018‌ :: 1697‌ جار بینراوە

دواڕۆژ، عەلی حەمە سەعید
لە كاتی كیمیابارانی هەڵەبجەدا پاسدارێكی ئێرانی منداڵێكی هەڵەبجەیی هەڵدەگرێتەوە و لەگەڵ خۆی دەیبات بۆ ئێران و تا ئێستاش لە ژیاندا ماوه‌، دواڕۆژیش لە زاری سەرۆكی كۆمەڵەی قوربانیانی كیمیابارانی هەڵەبجەوە وردەكاری دۆزینەوەی ئەو منداڵە ونبووەی هەڵەبجە دەخاتەڕوو.

لوقمان عەبدولقادر،سەرۆكی كۆمەڵەی قوربانیانی كیمیابارانی هەڵەبجە، بە دواڕۆژی ڕاگەیاند لە ڕێگەی نوێنەرەكانمان لە شارە جیاوازەكانی ئێرانەوە پێمانڕاگەیەنرا كە هاووڵاتییەكی ئێرانی پەیوەندی پێوەكردوون و ئەوەی ئاشكراكردووە كە منداڵێكی هەڵەبجەیی لای خۆی هێشتووەتەوەو ئامادەیە لەبەردەم ڕاگەیاندنەكان و كەسوكاری منداڵە ونبووەكانی هەڵەبجە وردەكاری ئەو بابەتە بخاتەڕوو.

ئاماژەی بەوەشكرد، ئەو هاووڵاتییە ئێرانییەی كە پەیوەندی بە نوێنەرەكانمانەوە كردووە لە ئێران، ئەوەی وتووە كە ئەو لە كاتی كیمیابارانی هەڵەبجەدا سەربازی سوپای پاسداران بووەو لەكاتی هاتنی بۆ ناو هەڵەبجە بینویەتی كە منداڵێك بە تەنها جێهێڵراوە، هەڵیگرتووەتوەو لەگەڵ خۆی بردوویه‌تی بۆ ئێران و تا ئێستاش پێكەوە دەژین و هەردووكیان لە ژیاندا ماون.

سەرۆكی كۆمەڵەی قوربانیانی كیمیابارانی هەڵەبجە هەرچەندە ئامادەنەبوو وردەكاری زیاتر لە بارەی ڕەگەز و تەمەنی ئەو منداڵە دۆزراوەی هەڵەبجە بخاتەڕوو، بەڵام ئەوەی خستەڕوو كە  لە دوای پشووی جەژنی قوربان لەگەڵ ئیدارە و دادگای هەڵەبجە ڕێكبكەوین كە ئەو كەسەی كە منداڵەكەی لایە بیهێنینەوە بۆ هەڵەبجە و دواتر وردەكاری زیاتر بۆ ڕای گشتی بخەینەڕوو.

سەرۆكی كۆمەڵەی قوربانیانی كیمیابارانی هەڵەبجە ئەوەشی وت "تا ئێستا 76 خێزانی هەڵەبجەیی ناوی خۆیان تۆماركردووە كە داوای دۆزینەوەی 82 منداڵی ونبوو دەكەن، هاوكات تا ئێستا نۆ منداڵی ونبوو دۆزراونەتەوە، بەڵام هێشتا بەشێكیان بە خێزانە ڕاستەقینەكانیان شاد نەبوونەتەوە.



created by Avesta Group and powered by Microsoft Azure