چه‌كدارانی داعش به‌ نامه‌ی واتس ئه‌پ كڕین و فرۆشتنیان به‌ ژنانی كورده‌وه‌ كردووه‌

هەواڵ / کوردستان :: 18/08/2018‌ :: 13370‌ جار بینراوە

دواڕۆژ، هانا چۆمانی 
لە کۆنفرانسی نێودەوڵەتیی بە جینۆسایدناساندنی کوردانی ئێزدی، كه‌ لەشاری هەولێر بەڕێوەچوو، نوسینگەی رزگارکردنی رفێندراوانی کچ و ژنانی ئێزیدی، پێشانگایەکی تایبەت بە تاوانەکانی دژ بە کوردانی ئێزیدی کردەوەو چەندین رەهەندی بە جیۆنسایدناساندنی تاوانەکەی خستەڕوو.

لە پێشانگاکەدا، نامەی چاتی بەرنامەی "وەتس ئەپ" نمایشکران کە لەرێگه‌یەوە چەکدارانی داعش مامەڵەی بازرگانیکردنیان بە ژنان و کچان ئەنجامداوە و نرخیان بۆ ژن و کچان كردوه‌".

گفتوگۆکان له‌رێگه‌ى مۆبایلی ئەو داعشانەن ئاشكرابووه‌، کە لە شەڕدا کوژراون و مۆبایلەکانیان کەوتووەتە دەست هێزە عێرقییەکان و پێشمەرگە و ئەرشیفکراون وەک بەشێکی گرنگی بەڵگەیی بۆ بەجیۆنسایدناساندنى کەیسی ئیزدییەکان و تاوانەکانی داعش بەرامبەر بە کوردانی ئێزیدی".

لەبارەی کۆنفرانس و پرسی بەڵگەکانی تایبەت بەجینۆسایدناساندنی کەیسی کوردانی ئێزیدی، خەیری بۆزانی بەڕێوەبەری گشتی کاروباری ئێزدییەکان و بەرپرسی دۆسیەی رزگارکردنی رفێندراونی ئێزدی، بە داڕۆژی راگەیاند، "زیاتر لە شەش ھەزار کوردی ئێزدی لە لایەن داعشەوە رفێندراون و  زیاتر لە ١٠٠ ھەزار کوردی ئێزدیش بۆ دەرەوەی وڵات کۆچیان کردووە، تا ئێستاش ٣١٠٢ ئێزدی بێسەروشوێنن".

بۆزانی، ڕاشیگەیاند "ئەوەی ئێمەی لێرە کۆکردووەتەوە، باسکردنی کۆمەڵکوژییەکی دیکەیە دژ بە کوردانی ئێزیدی و ئەو نامانەی کە لە پێشانگاکەدا نمایشکراون بەڵگەی بەهێزی ئەوەن کە چۆن داعش بازرگانی بە ژنان و کچانەوە کردووە کە زیاترە لە جینۆسایدکردنێک، نەک بەتەنیا جینۆساید، بەڵکو هەموو پێوەرەکانی لەناوبردنی ئێزیدییەکان لەخۆدەگرێت".

دەڵێت "بەپێی دواین ئامار تا ١٤ی ئابی ٢٠١٨ تا ئێستا زیاتر لە ٢٥٠٠ سڤیل، شەهیدکراون و ٦٢ گۆڕی بە کۆمەڵ دۆزراونەتەوە و کۆی شەش ھەزار و ٤١٧ رفێندراوی کوردی ئێزدی، تا ئێستاش سێ ھەزار و ٣١٥ کەس رزگارکراون، سێ ھەزار و ١٠٢ کەسیش بێسەروشوێنن".



  • ڕۆژ
  • هەفتە
  • مانگ
created by Avesta Group and powered by Microsoft Azure