وەرگێڕەکە ناوەڕۆكی ڕۆمانی (لە مەككە) ڕووندەكاتەوە

هەواڵ / که‌لتور :: 19/08/2018‌ :: 561‌ جار بینراوە

تاگ :: رۆشنبیرى

دواڕۆژ، ئاكۆ حەمەد رابی 
(لە مەككە) تازەترین ڕۆمانی قادر عەبدوڵـڵا نووسەری ناوداری ئێرانی-یە كە بە هۆڵەندی دەنووسێت، شەفیقی حاجی خدر لە هۆڵەندی-یەوە وەریگێڕاوەتەسەر زمانی كوردی و لەڕێگەی دواڕۆژ-ەوە زانیاری لەبارەی نووسەر و ناوەڕۆكی ڕۆمانەكە دەداتە خوێنەرانی.  

لەبارەی نووسەری ئەو ڕۆمانە و ناوەڕۆكی ڕۆمانەكەیەوە، شەفیقی حاجی خدر بۆ دواڕۆژ وتی "قادر عەبدوڵـڵا لە ناوەڕاستی هەشتاكانی سەدەی ڕابردوو، ڕوودەكاتە هۆڵەندا و لەوێ وەك پەنابەر دەگیرسێتەوە، وەك خۆی لە دووتوێی ڕۆمانەكانیدا باسی دەكات، لە هۆڵەندا زمانی نووسینیشی دەگۆڕێت، ئیدی دوای ئەوەی فێری زمانی هۆڵەندی دەبێت، هەر بەو زمانە دەنووسێت، لەو بیست و یەك پەرتووكەی كە تائێستا بە چاپی گەیاندوون، تەنیا یەك دانەیان بە زمانی فارسی نووسیوە، ئەویش لەسەر كورد بووە بە ناوی (كوردەكان چی دەڵێن)". 

شەفیقی حاجی خدر دەڵێت "قادر عەبدوڵـڵا-ی نووسەر، وێڕای چیرۆك و ڕۆمانەكانی، ستووننووسێكی بەناوبانگی هۆڵەندییشە، لە ڕۆژنامە دیارەكانی هۆڵەندا دەنووسێت و ستوونەكانیشی بوونەتە كتێب". "ئەوەی زۆر سەرنجڕاكێشە و وایكردووە خوێنەرێكی زۆری لە ئەوروپا، چ بە زمانی هۆڵەندی و چ بە زمانەكانی دیكە هەبێت، ئەوەیە كە ڕۆمانەكانی وەرگێڕدراونەتە سەر زمانە زیندووەكانی جیهان".

لەبارەی ئەم ڕۆمانەیشەوە، وەرگێڕەكەی ئەوە رووندەكاتەوە كە "نووسەر كۆمەڵێك سەرەداو دەدات بەدەستەوە، ئیدی دەكەوێتە سەر خوێنەر چۆن سەرەداوەكان هەڵبپێچێتەوە. ئەو سەرەداوانەیش خۆیان لە چەند بوارێكدا دەبیننەوە، وەك: ئاوارەیی، پەیوەندیی دایك و كوڕ دوای ئەوەی ساڵانێكی زۆر یەكدیان نەبینیوە، بەهەمان شێوە پەیوەندیی نێوان خوشك و برا، بیروباوەڕی دایكێكی كۆنباو لەگەڵ ڕۆڵەكەی كە چووەتە جیهانی نوێ و پێشكەوتووەوە، پرسی كورد بەوەی كە لە ڕژێمی داگیركەرانی كوردستاندا لەسەر وێنەی پێشمەرگەكە چ حەشرێك بە هەڵگرانی وێنەكە دەكەن، چ جای سەلماندنی مافەكان، تاسەمەندیی و پەرۆشی بۆ گەڕانەوە بۆ زێد، بۆ نیشتیمان. مێژووی فتوحات و داگیركاری عەرەبی ئیسلامی و سڕینەوەی شارستانیەتی كۆنی ئێرانی، یەكلاییكردنەوەی سیحری حەج بە شێوازی خۆی".  

بە گوتەی وەرگێڕەكە "ڕووداوەكانی ئەم ڕۆمانە لە ماوەی تەنیا حەفتا ڕۆژدایە، واتە ڕۆمانەكە زادەی سەفەرێكی حەفتا ڕۆژیی ڕۆماننووسە لە هۆڵەنداوە بۆ دوبەی، كە دایكیشی لە تارانەوە بەهۆی نەخۆشیی لەبیرچوونەوە دەچێتە ئەوێ، بەم جۆرە دایكەكەی هەروا دەزانێ كوڕەكەی بۆیە بانگی كردووە، تا بیباتە مەككە و ماڵی خودا و حەجی پێبكات". "ئیدی لە میانەی ماوەی بەئاگایی و بێئاگایی دایكدا، كوڕەكە چیرۆكەكە دەگێڕێتەوە". 



created by Avesta Group and powered by Microsoft Azure