سەرۆکی رێکخراوی بەدر لەکەرکوک: لاریمان نییە لەگەڕانەوەی پێشمەرگە

هەواڵ / کوردستانی :: 13/08/2018‌ :: 332‌ جار بینراوە

دواڕۆژ، عیماد جەباری
سەرۆکی میحوەری باکوری بەدر سەبارەت بە چەند پرسێکی جیاواز تایبەت بەکەرکوک کۆنگرەیەکی رۆژنامەوانی رێکخست.


محەمەد مەهدی بەیاتی سەرۆکی میحوەری باکوری رێکخراوی بەدر لەمیانی کۆنگرە رۆژنامەوانییەکەدا رایگەیاند، لاریمان لەگەڕانەوەی پێشمەرگە نییە بۆ کەرکوک، بەڵام بەمەرجێک لەچوارچێوەی سیستمی بەرگری عێراقدا بێت و فەرمانەکانی حەیدەر عەبادی سەرۆک وەزیران جێبەجێبکات.

سەبارەت بەگەڕانەوەی حزبە کوردستانییەکانیش وتی "حزبە کوردستانییەکان خاوەن مێژوویەکی دێرینن و هیچ کێشەیەکمان نییە لەبارەی گەڕانەوەیان، بەڵام گەڕانەوەی ئاسایش و دەزگا ئەمنییەکانی سەر بەحزبەکان قبوڵ ناکەین".

سەرۆکی میحوەری باکوری بەدر ئەوەشی خستەڕوو کە پۆستی پارێزگاریان بەلاوە گرنگ نییە و هیڵی سوریان بەرامبەر هیچ کەسایەتییەکی کوردیش نییە بۆ وەرگرتنی ئەو پۆستە بەمەرجێک راسپاردە و بڕیارەکانی بەغدا جێبەجێبکات.

لەبارەی دیاردەی زیادەڕۆییکردنیش لەلایەن کەسانێکەوە کە خۆیان بەلایەنگری بەدر دەناسێنن، محەمەد مەهدی بەیاتی داوایکرد هێزە ئەمنییەکان رێوشوێنی توند بەرامبەر ئەو کەسانە بگرنەبەر کە بەناوی رێکخراوەکەیانەوە زیادەڕۆیی و تاوان ئەنجامدەدەن و لەبنەڕەتیشدا هیچ پەیوەندییەکیان بەو کەسانەوە نییە و زۆربەیان ناسنامەی ساختەی بەدریان هەڵگرتووە.

لەتەوەرێکی دیکەی کۆنگرە رۆژنامەوانییەكەدا بەیاتی راشیگەیاند، هاوشێوەی شارەکانی باشوری عێراق خۆپیشاندان دەکەن بۆ ئاشکراکردنی گەندەڵکاران و ساختەکارەکانی هەڵبژاردن.



created by Avesta Group and powered by Microsoft Azure