هه‌لوه‌ستێ پارتى و ئێكه‌تى لدۆر ڤه‌كێشانا حه‌شدا شه‌عبى ل شنگال

هەواڵ / کوردستان :: 10/08/2018‌ :: 232‌ جار بینراوە

دواڕۆژ، دهۆك
پارتى دیموكراتى كوردستان و ئێكه‌تى نیشتیمانى كوردستان ب ڤه‌كێشانا هیزێن حه‌شدا شه‌عبى ل شنگال  دلخوه‌شن و دبێژن، پشتى حه‌شدێ چالاكیێن وان یێن حزبى دێ زێده‌تر لێهێن.

رۆژا پێنجشه‌مبى 9-ێ ته‌باخێ، فه‌هد حامد، ده‌ڤه‌ردارێ شنگال بۆ دواڕۆژ گۆت "سێ رۆژێن بهێت حه‌شدا شه‌عبى دێ هه‌موو هێزێن خوه‌ ژ شنگال  ڤه‌كێشیت".

قادر قاچاخ،  به‌رپرسێ لقا پارتى ل شنگال بۆ دواڕۆژ گۆت "ڤه‌كێشانا حه‌شدا شه‌عبى دێ بیته‌ رێخۆشكه‌ر ئه‌نجۆمه‌ن و ده‌ڤه‌رداریا شنگال یێن شه‌رعى و هه‌لبژاردى جاره‌كادى ڤه‌گه‌رن شنگال".

قاچاخ ئینا زمان "ئه‌گه‌ر ئیداره‌یا شنگال ب ره‌نگه‌كێ ئاساییى و یاسایى كارێ خوه‌كر وى ده‌مى پارتى ژى دێ ڤه‌گه‌ریت شنگال".

لدۆر هه‌مان مژار داود جوندى، جێگرێ به‌رپرسێ مه‌لبه‌ندێ به‌رێ یێ ئێكه‌تى نیشتیمانى كوردستان كو نوكه‌ ئه‌ندامێ جڤاتا پارێزگه‌ها مووسله‌ بۆ دواڕۆژ گۆت "ئێكه‌تى لسه‌ر ده‌مێ حه‌شدا شه‌عبى شنگال چۆلنه‌كربوو، لێ ڤه‌كێشانا حه‌شدێ دێ بیته‌ سه‌ده‌م كو چالاكیێن وان یێن حزبى زێده‌تر لێبهێن".

جوندى زه‌لالكر "ده‌مێ حه‌شدا شه‌عبى ل شنگال ئێكه‌تى ڤیا ره‌وشه‌كا گۆنجاى ل وێ قه‌زایێ هه‌بیت و چو پێكدادانێن راسته‌وخوه‌ دناڤبه‌را واندا چێنه‌بن ئه‌وژى بۆ خاترا پاراستنا شنگالیان".

هه‌ر ژ چریا ئێكێ یا سالا ده‌ر‌بازبووى تا نوكه‌ پارتى نه‌ڤه‌گه‌ریایه‌ شه‌نگال و ئێكه‌تى ژى ب تنێ ب نێزیكى 10 كادران خه‌باتێن خوه‌ ل وێ قه‌زایێ دكرن.

 



created by Avesta Group and powered by Microsoft Azure