"تا 20 رۆژی تر پاركی ئازادی لەناودەچێت"

هەواڵ / چاوپێکەوتن :: 07/08/2018‌ :: 17326‌ جار بینراوە
جەمال عەبدوڵـڵا

دواڕۆژ، سامان قوبادی
جەمال عەبدوڵـڵا لێپرسراوی پاركی ئازادی لە سلێمانی، لە چاوپێكەوتنێكی دواڕۆژدا دەڵێت "ئەگەر حكومەت تا 20 رۆژی تر پارە بۆ ئاودانی دار و باخەكان تەرخان نەكات، ئەوا پاركەكە لەناودەچێت". 

دواڕۆژ: مێژووی دروستكردنی پاركی ئازادی بۆ كەی دەگەڕێتەوە و كێ بەردی بناغەی دانا؟
جەمال عەبدوڵـڵا:
پاركی ئازادی سلێمانی لە 26/11/1994 لەلایەن خاتوو كافیە سلێمان، كە ئەوكات وەزیری شارەوانی بوو، بەردی بناغەی دانراو و دەست بە دروستكردنی كرا، لە ساڵی 2004دا پرۆژەكە تەواو بوو.

دواڕۆژ: رووبەری پاركەكە چەندە و لەچی پێكدێت؟
جەمال عەبدوڵـڵا:
رووبەری پاركەكە 176 دۆنم زەوییە، 126 دۆنمی دارستان و چیمەنە، 50 دۆنمی تایبەتە بە شوێنی راگرتنی ئۆتۆمبێل، پێكدێت لە 10 باخچەی گەورە، جگەلەوە 6 هەزار و 900 داری جۆراوجۆری تێدایە.

دواڕۆژ: پاركی ئازادی پاركێكی گەورەی شارە، بەڵام وەك دەبینرێت ژمارەیەكی كەم كارمەند و باخەوانی هەیە، چەند كەسن؟
جەمال عەبدوڵـڵا:
تەنیا 61 باخەوانمان هەیە، واتە بۆ هەر 2 دۆنم زەوی باخەوانێك هەیە خزمەتی بكات، كە رێژەیەكی زۆر كەمە، لەكاتێدا دەبوایە پاركەكە زیاتر لە 170 باخەوانی هەبوایە، بەشێك لەوانەی كاری تێدادەكەن كەمئەندام و بەساڵاچوون.

دواڕۆژ: بەشێكی زۆری دار و سەوزاییەكانی ناو پاركەكە وشك و زەرد بوون بێخزمەتییان پێوە دیارە كێشە و هۆكارەكانی چین؟
جەمال عەبدوڵـڵا:
بەهۆی كەمئاوی و ئاونەدانیان دارەكان بەرەو وشكبوون دەچن و باخەكانیش زەرد بوون، حكومەت و وەزارەتی دارایی بەرپرسیارن، چونكە تەنكەرمان نییە بۆ ئاودانیان، زۆرترین رێژەی سەوزایمان هەیە، بەڵام بەهۆی دابیننەكردنی بودجە بۆ بەكرێگرتنی تەنكەر و ئاونەدانیان وشك و زەرد بوون، تەنیا یەك تەنكەرمان هەیە و شۆفێری نییە، حكومەت كەسمان بۆ دانامەزرێنێت.

دواڕۆژ: لەماوەی یەك هەفتەدا چەند جار ئاوی دار و باخچەكان دەدرێت؟ پێویستە چەند جار ئاویان بدرێت؟
جەمال عەبدوڵـڵا:
لە وەزری گەرمادا دەبێت هەفتەی 3 جار لە بەیانیان یان شەوان ئاو بدرێن، بەڵام ئێستا لە هەفتەیەكدا تەنیا یەك جار ئاو دەدرێن. 

دواڕۆژ: پاركەكە چەند بیری ئاوی هەیە؟ پێویستی بە لێدانی چەند بیری ترە؟
جەمال عەبدوڵـڵا:
پێنج بیری هەیە، پێویستمان بە لێدانی دوو بیر هەیە بە قوڵی 180 مەتر. باخمان دروستكردووە هاوكات داوای لێدانی بیرمان كردووە، سەرجەم كارەكانی تەواوكراوە،  لەلایەن حكومەت و وەزارەتی دارایی-ەوە پارەمان بۆ دابینناكرێت. سەرۆكی شارەوانی سلێمانی لە هەوڵی ئەوەدایە لەڕێگەی خێرخوازانەوە پارەی بۆ كۆبكاتەوە. كێشەی سەرەكیمان تەرخاننەكردنی پارە بۆ تەنكەر و كەمی باخەوانە، پێویستیمان بە چوار تەنكەر هەیە، جگەلەوە كێشەی نەبوونی گاز و بەنزینمان هەیە.

دواڕۆژ: داهاتی ساڵانەی ئەم پاركە چەندە و چی لێدەكرێت؟ بۆچی دابینناكرێت بۆ كڕینی تەنكەر و مووچەی كارمەندان؟
جەمال عەبدوڵـڵا:
داهاتی ساڵانەی پاركی ئۆتۆمبیلەكان كە بەكرێدراون 110 ملیۆن دینارە، ئەم داهاتە لەگەڵ كرێی كۆشكەكان دەگەڕێتەوە بۆ وەزارەتی دارایی لە هەولێر، داوامان كردووە بەشێك لەو داهاتەمان پێبدرێت بەڵام نایدەن، لە مانگی 2ی ئەمساڵەوە داوای پارەمان كردووە بۆ كڕین یان بە كرێگرتنی تەنكەر، وەزارەتی دارایی لە مانگی 8 دا پارە بۆ كرێی تەنكەر دابین دەكات لەكاتێكدا كاتێك دار و باخەكان بەرەو وشك و زەردبوون چوون و كاتی ئاودان نامێنێت، بەپێچەوانەوە لە مانگی 4 وە پارە بۆ بەكرێگرتنی تەنكەر بۆ ئاودانی پارك و باخچەكانی هەولێر دابینكراوە، جیاوازییەكی زۆر لەنێوان سلێمانی و هەولێردا دەكرێت.

دواڕۆژ: ژمارەی ئەو كەسانە چەندە كە رۆژانە سەردانی پاركی ئازادی دەكەن؟
جەمال عەبدوڵـڵا:
لەماوەی شەو و رۆژێكدا زیاتر لە 2 هەزار كەس دێنە پاركی ئازادی، لە رۆژانی پشوودا رێژەكە بۆ زیاتر لە 4 هەزار كەس بەرزدەبێتەوە، بەداخەوە خەڵك زۆر هاوكارمان نین و خۆڵ و خاشاك فڕێ دەدەنە ناو باخ و حەوزی ئاوەكان.

دواڕۆژ:  ئەگەر حكومەت یان لایەنی پەیوەندیدار خەمی ئەم پاركە نەخۆن رووبەڕووی چی دەبێتەوە؟ 
جەمال عەبدوڵـڵا:
نووسراومان كردووە بۆ وەزارەتی دارایی پێمان وتوون ئەگەر لە ماوەی 10 رۆژی داهاتوودا تەنكەرمان بۆ دابین نەكەن، بەرپرسیارێتی پاركەكە لە ئەستۆ ناگرین، بۆیە لەماوەی 20 رۆژی داهاتوودا حكومەت نەیەتە سەر خەت و پارەمان بۆ دابین نەكات پاركی ئازادی لەناو دەچێت. 

دواڕۆژ: بۆچی پارێزگار یان بەرپرسانی ئەم شارە نەهاتوونەتە سەر خەت و چارەسەری كێشەكانی ناكەن؟
جەمال عەبدوڵـڵا:
كەس خۆی ناكات بە خاوەنی، پارێزگاری سلێمانی تائێستا سەردانیشی نەكردوین، تەنیا قایمقام هاوكارمانە.



  • ڕۆژ
  • هەفتە
  • مانگ
created by Avesta Group and powered by Microsoft Azure