حكومەت بڕیارێک لە بەرژەوەندی بەركەوتووانی چەكی كیمیایی دەردەکات

هەواڵ / کوردستان :: 07/08/2018‌ :: 394‌ جار بینراوە

دواڕۆژ، عەلی حەمە سەعید
دوای دوو ساڵ لە نەناردنە دەرەوەی هیچ بەركەوتوویەكی چەكی كیمیایی بۆ دەرەوەی هەرێم بە مەبەستی وەرگرتنی چارەسەر، دواجار حكومەتی هەرێم بڕیاریدا ئەو دۆسیەیە لە وەزارەتی كاروباری شەهیدان وەربگرێتەوە و ڕادەستی وەزارەتی تەندروستی بكات.


لوقمان عەبدولقادر، سەرۆكی كۆمەڵەی قوربانیانی كیمیابارانی هەڵەبجە بە دواڕۆژی راگەیاند، لە ئێستادا 975 كەس وەك بەركەتووی چەكی كیمیایی هەڵەبجە تۆماركراون، لەو ژمارەیەش 35 بەركەوتەیان باری تەندروستیان ناجێگیرە و پێویستیان بە چارەسەری بە پەلە و ئەنجامدانی نەشتەرگەری هەیە، بەڵام ماوەی دوو ساڵە هیچ بەركەوتوویەكی چەكی كیمیایی ڕەوانەی دەرەوە نەكراوە، ئەوەش بەهۆی ئەوەی دۆسەیەی بەركەوتوانی چەكی كیمیایی لە نێوان وەزارەتی تەندروستی و كاروباری شەهیدان بە هەڵواسراوی مابویەوە.

ئاماژەی بەوەشكرد، لەسەر داوای ئێمە سەرۆكایەتی ئەنجومەنی وەزیران بڕیاریداوە بە وەرگرتنەوەی دۆسیەی بەركەوتووانی چەكی كیمیایی لە وەزارەتی كاروباری شەهیدان و ڕادەستكردنی بە وەزارەتی تەندروستی، هاوكات بڕیاریش دراوە بە پێكهێنانی لیژنەیەك كە نوێنەری وەزارەتی دارایی و كۆمەڵەی قوربانیان و وەزارەتی تەندروستی تیایدا ئەندامن بۆ دەستنیشانكردنی ئەو كەسانەی زۆر پێویستن ڕەوانەی دەرەوە بكرێن.

سەرۆكی كۆمەڵەی قوربانیانی كیمیابارانی هەڵەبجە ئەوەشی وت، وەك لیژنەكە بڕیارمانداوە كە لە قۆناغی یەكەمدا 10 بەركەوتووی چەكی كیمیایی كە زۆر پێویست بوو ڕەوانەی دەرەوە بكرین دەستنیشان كراون هاوكات لە ڕۆژانی داهاتووشدا پرۆسەكە بەردەوامی دەبێت بۆ ناردنەدەرەوەی ئەوانی دیكە هەموو خەرجی و پێدایستیەكانیشیان لەسەر وەزارەتی دارایی و تەندروستی جێبەجێدەكرێت.



created by Avesta Group and powered by Microsoft Azure