لەبارەی مووچەوە وەزیری دارایی هەرێم دڵنیایی دەدات

هەواڵ / کوردستان :: 06/08/2018‌ :: 8262‌ جار بینراوە

دواڕۆژ، ئاوارە حەمید
وەزیری دارایی حكومەتی هەرێم رایدەگەیەنێت "سەرەڕای دابەشكردنی مووچە لەكاتی خۆیدا، لە ئێستادا لەهەوڵی تەواوداین بۆ بەگەڕخستنەوەی پڕۆژە خزمەتگوزارییەكان لە پێناوخزمەتكردنی خەڵكی كوردستان".


ئەمڕۆ دووشەممە 6/8/2018،  رێباز حەملان، وەزیری دارایی و ئابووری حكومەتی هەرێمی كوردستان پێشوازیكرد لە د. هەڤاڵ ئەبوبەكر، پارێزگاری سلێمانی.

لەسەرەتای كۆبوونەوەكە د. هەڤاڵ ئەبوبەكر، پارێزگاری سلێمانی باسی لە كێشە و گرفتی هاوڵاتیانی سنوری پارێزگای سلێمانی كرد بە مەبەستی خزمەتكردنی زیاتری خەڵكی ئەو پارێزگایە.

بەپێی راگەیەنراوێكی وەزارەتی دارایی، لە كۆبوونەوەكە رێباز حەملان، وەزیری دارایی و ئابووری حكومەتی هەرێم باسی لەوەكرد كە لەسەر راسپاردەی نێچیرڤان بارزانی، سەرۆكی ئەنجوومەنی وەزیران، بەمەبەستی خزمەتكردنی زیاتری خەڵكی پارێزگای سلێمانی  پارەی پێویست تەرخانكرا بۆ پڕۆژەكانی نیشتەجێبوونی (زڕگوێز و سیتەك) كە دوو هەزار و پێنج سەد یەكەی نیشتەجێبوونە بۆ هاوڵاتیانی كەمدەرامەت.

هەروەها بڕێك پارە بۆ دابینكردنی پێداویستی فەرمانگەكانی پارێزگای سلێمانی تەرخانكراوە بۆ راییكردنی ئیش و كاری فەرمانگاكان و هاوڵاتیان.

هاوكات زیاتر لە 2 ملیار دینار بۆ بەڕێوەبەرایەتی گشتی كارەبای سلێمانی تەرخانكراوە بە مەبەستی كڕینی محاویلە و هێڵەكانی كارەبا بۆ چارەسەركردنی كێشەی كارەبا لە سنوری پارێزگاكە.

وەزیری دارایی و ئابووری تاكیدی كردەوە كە سەرەڕای دابەشكردنی مووچە لەكاتی خۆیدا لە ئێستادا حكومەتی هەرێم لە هەوڵی تەواودایە بۆ بەگەڕخستنەوەی پڕۆژە خزمەتگوزاریەكان لە پێناوخزمەتكردنی خەڵكی كوردستان.



  • ڕۆژ
  • هەفتە
  • مانگ
created by Avesta Group and powered by Microsoft Azure