هەڵەبجە: بۆ یەكەمجار گەورەترین پڕۆژەی بەرهەمهێنانی گۆشت و شیر دەكرێتەوە

هەواڵ / ئابوری :: 28/07/2018‌ :: 1241‌ جار بینراوە

دواڕۆژ، عەلی حەمە سەعید
بۆ یەكەمجار بەردی بناغەی گەورەترین پڕۆژەی بەخێوكردن و بەرهەمهێنانی گۆشت و شیری ئاژەڵی خۆماڵی لە سنوری پارێزگای هەڵەبجە دانرا، كە دەتوانێت پێداویستی بەشێکی پارێزگای هەڵەبجە و سلێمانی لە گۆشت و شیر دابینبكات.


عەلی عوسمان پارێزگاری هەڵەبجە بەوەكالەت بەدواڕۆژی ڕاگەیاند "بەمەبەستی گرنگیدان بە كەرتی كشتوكاڵ و ئاژەڵداری و پشتبەستن بە بەرهەمی ناوخۆیی، وەك ئیدارەی پارێزگای هەڵەبجە بە پێویستمانزانی كە پڕۆژەیەكی بەخێوكردن و بەرهەمهێنانی گۆشت و شیری خۆماڵی لە سنورەكەدا بوونی هەبێت".

وتیشی "لە گوندی (تەپی سەفا)ی سەر بەناحیەی خورماڵ بەردی بناغەی یەكەم پڕۆژەمان دانا، ئەوەش دوای ئەوەی لەلایەن خاوەنەكەیەوە هەموو ڕێكارە ئیداری و یاساییەكانی تەواو کراوە".

ستار مەحمود بەڕێوەبەری گشتی كشتوكاڵی هەڵەبجە بە دواڕۆژی ڕاگەیاند "پلانی ئێمە لە وەزارەتی كشتوكاڵ ئەوەیە كوردستان بگەیەنینە ئاستی خۆبژێوی لەهەموو بەرهەمە خۆراكییەكان و شیرەمەنییەكاندا، لە چەند ڕۆژی داهاتووشدا مۆڵەت بە كردنەوەی پڕۆژەیەكی دیكەی لەم شێوەیە دەدەین، بۆیە كردنەوەی ئەم پڕۆژەیە پێداویستی دانیشتووانی بەشێكی سلێمانی و هەڵەبجە و ناوچەی شارەزور لە گۆشت و شیر دابیندەكات".

هەروەها عادل حەسەن، خاوەنی پڕۆژەی بەخێوكردنی ئاژەڵ و بەرهەمهێنانی گۆشت و شیر ئەوەی بە دواڕۆژ وت "ئەم پڕۆژەیەی ئێمە نزیكەی ۳۰ دۆنم زەوی بۆ تەرخانكراوەو ٤ دۆنمی دەكرێتە قاعە و بەشێكی زۆری زەوییەكەش دەكەینە وێنجە بۆ مانگاكان و لەماوەی شەش مانگی داهاتوودا كارەكانمان بە كۆتا دەگەیەنین و لە قۆناغی یەكەمیشدا زیاتر لە 300 مانگای هۆڵەندی بۆ دەهێنین.



created by Avesta Group and powered by Microsoft Azure