دواڕۆژ ناوی سەرۆکى به‌شێك له‌ لیستەکانی هەڵبژاردنی پەرلەمانی کوردستان ئاشکرادەکات

هەواڵ / کوردستان :: 25/07/2018‌ :: 8119‌ جار بینراوە

دواڕۆژ، هانا چۆمانی 
هەرچەند تاکوو ئێستا سەرجەم لیست و قەوارەکان ناوی کاندیدانیان ئاشكرانەكردووە، بەڵام بەشێکیان ناوی سەرۆک لیستەکانیان دیاریکردوە و بەشێکیشیان تاکو ئێستا یەکلانەبوونەتەوە، دواڕۆژیش ناوی بەشێك لە سەرۆك لیستەكان بڵاودەكاتەوە.

 
هەرچەندە بەپێی بڕیار و ئاگادارکردنەوەی قەوارە و حزبەکان لەلایەن کۆمسیۆنی باڵای سەربەخۆیی هەڵبژاردن و راپرسیەوە، ئەمڕۆ چوارشەممە 25ى تەمموزی 2018 دوایین رۆژبوو بۆ رادەستکردنی ناوی کاندیدان بە کۆمسیۆن، بەڵام ئەمڕۆ لەکۆنگرەیەکی رۆژنامەوانیدا کۆمسیۆن وادەکەی بۆ رۆژی یەکشەممەی داهاتوو 29ى تەمموزی 2018 درێژکردەوە.

بەپێی ئەو زانیارییانەی دەست دواڕۆژ كەوتووە، سەرۆك لیستەكان بەمشێوەیە دەبێت:
1. سەرۆکی لیستی کۆمەڵی ئیسلامی، (سۆران عومەر) ئەندامى ئێستای پەرلەمانی کوردستان. 
2. سەرۆکی لیستی پارتی دیموکراتی کوردستان، (هێمن هەورامی) ئەندامی سەرکردایەتی پارتی.
3. سەرۆکی لیستی یەكێتی نیشتیمانی کوردستان، (قوباد تاڵه‌بانى) جێگرى سه‌رۆك وه‌زیرانى هه‌رێمى كوردستان.
4. سەرۆکی لیستی جوڵانەوەی نەوەی نوێ، (شاسوار عەبدولواحید) سەرۆکی جوڵانەوەكه.
5. سەرۆکی لیستی بەرەو ئیسلاح کە بزوتنەوەی ئیسلامی و یەکگرتووی ئیسلامی کوردستانن (ئەبوبەکر هەڵەدنی) پەرلەمانتاری ئێستای یەکگرتوو.
6. سەرۆکی لیستی بزوتنەوەی گۆڕان، (عەبدوڵای مەلا نوری) یان (بروزۆ مەجید)، تاکو ئیستا گۆران بڕیاری کۆتایی نەداوە کە کامیان دەبن بە سەرۆک لیست.
7. هاوپه‌یمانى بۆ دیموكراسى و دادپه‌روه‌رى، (د. به‌رهه‌م ساڵح) سه‌رۆكى هاوپه‌یمانیه‌كه‌.
8. هاوپەیمانی سەردەم کە پێکدێت لە حیزبی سۆسیالیست دیموکراتی کوردستان، پارتی کرێکاران و رەنجدەرانی کوردستان و یەکێتی نەتەوەیی دیموکراتی کوردستان، (عەبدوڵا حاجی مەحمود) کە کاندیدی حیزبی سۆسیالیستە سەرۆکی لیستەکە.



created by Avesta Group and powered by Microsoft Azure