سەرۆكی ئەنجومەنی پارێزگای سلێمانی داوای لێبووردن لەدەنگدەران دەكات

هەواڵ / چاوپێکەوتن :: 18/07/2018‌ :: 1437‌ جار بینراوە
ئازاد محەمەد

دواڕۆژ، سامان قوبادی 
بەهۆی جێبەجێنەكردنی ئەو بەرنامەیەی دایاننابوو، سەرۆكی ئەنجومەنی پارێزگای سلێمانی داوای لێبووردن لە دانیشتوانی شاری سلێمانی دەكات. لە چاوپێكەوتنێكی دواڕۆژدا ئازاد محەمەد سەرۆكی ئەنجومەنی پارێزگای سلێمانی دەڵێت "ئامادەم بۆ لێپرسینەوە ئەگەر لە ماوەی ئەم چوار ساڵەدا سامانەكەم زیادیی كردبێت".


دواڕۆژ: دوای چوار ساڵ ئەنجومەنی پارێزگای سلێمانی چی بۆ دانیشتوانی ئەم پارێزگایە كردووە؟ تاچەند ئەو بەرنامەیەی داتاننابوو جێبەجێتان كرد؟
ئازاد محەمەد
: بەناوی ئەنجومەنەوە داوای لێبوردن لە هەموو دەنگدەرانی پارێزگای سلێمانی دەكەین، لەبەرئەوەی لە بەرنامەی كاری كۆبوونەوەكانی ئەنجومەن و هەموو فراكسیۆنەكانیش ئەو بەرنامەی كارەی هەمان بوو نەمانتوانی وەكو پێویست جێبەجێی بكەین، لەبەرئەوەی لەسەرەتای دەستبەكاربوونی ئێمەدا تووشی شەڕی داعش بوەین، پەیوەندییەكانی هەرێم و ناوەند تێكچوو، نرخی نەوت دابەزی، بودجەی پەرەپێدانی پارێزگاكان نەما كە هۆكاری سەرەكی بوو بۆ ئەوەی نەتوانین بەرنامەی كاری ئەنجومەنی پارێزگا و ئەوەی كە خۆمان دەمانویست بۆ دەنگدەرانمان جێبەجێی بكەین.

دواڕۆژ: كەواتە لەئاستی متمانەی دەنگدەرانی پارێزگای سلێمانی نەبوون؟
ئازاد محەمەد: ئەنجومەن لەئاستی پێویستدا بووە، بەڵام هۆكارەكان نەیانهێشت ئەو بەرنامەی كارەی كە هەمانبوو بۆ ماوەی چوار ساڵ، خزمەتی هاووڵاتییانی پێ بكەین.

دواڕۆژ: لەماوەی چوارساڵدا چەند بەرپرسی ئەم پارێزگایە بانگێشتكراون و متمانەیان لێ وەرگیراوەتەوە؟
ئازاد محەمەد: هەموو پارێزگارەكانمان لە ماوەی ئەم چوارساڵەدا بانگێشتی ئەنجومەن كردووە، جگەلەوە قایمقام و بەڕێوەبەری ئاسایش-مان بانگێشت كردووە، یاسای ژمارە 3ی ساڵی 2009ی ئەنجومەنی پارێزگاكان بەپێی ئەو دەسەڵاتەی پێماندراوە دەسەڵاتی خۆمان بەكارهێناوە، لە هەر راپۆرتێكدا هاتبێتە لامان، وەكو سەرۆكایەتی و ئەندامانی ئەنجومەن هەستمان كردبێت لە هەر بەرپرسێكدا كەموكورتی هەبووە، راستەوخۆ هاتووینەتە سەرخەت یان بانگێشتمان كردووە یاخود لیژنەمان بۆ ناردووە.

دواڕۆژ: بەپێی كام یاسا ئەنجومەن ماوەی كاركردنی خۆی درێژكردەوە؟ ئایا لەدوای تەواوبوونی ئەو 90 رۆژە هەڵبژاردن بۆ ئەنجومەنی پارێزگاكان دەكرێت؟ 
ئازاد محەمەد: ناتوانین ماوەی كاركردنی خۆمان درێژ بكەینەوە، چونكە لە دەسەڵاتی پەرلەمانی كوردستاندایە، بەپێی یاساكە لە مادەی 31 لە بڕگەی 3 دا دەڵێت، لەكاتی ئەستەمبوونی ئەنجامدانی هەڵبژاردن، ئەنجومەنی پارێزگاكان بۆیان هەیە تا 90 رۆژ لەسەر كارەكانی خۆیان بەردەوام بن، لەو ماوەیەدا ئەنجومەنی وەزیران و پەرلەمانی كوردستان و كۆمسیۆن دەبێت چارەنووسی ئەنجومەنەكان یەكلایی بكەنەوە. ئێستا پەرلەمانی كوردستان نووسراوێكی ئاراستەی كۆمسیۆن كردووە و تێیدا داوای كردووە تابزانرێت چەند كاتیان پێویستە بۆ ئەنجامدانی هەڵبژاردنەكان. هەموو فراكسیۆنەكان هاودەنگن كە لەگەڵ هەڵبژاردنی پەرلەماندا بكرێت.

دواڕۆژ: ئەنجومەنی پارێزگاكان لەلایەن خەڵكەوە متمانەیان پێدەدرێت، بەڵام دەسەڵاتییان لە خوار وەزیر یان وەزارەتی ناوخۆوەیە، ئایا ئەمە ئەوە ناگەیەنێت ئەنجومەنەكان گرنگ نین و زیادەن؟
ئازاد محەمەد: ئەنجومەنی پارێزگا واتە سیستمی لامەركەزی، هەركاتێك ئەم سیستمە لە ئەدای كاری ئەنجومەنەكان بەرقەرار نەبوو، واتە وەكو پێویست ناتوانن كارەكانی خۆیان بكەن، بۆیە كە سیستم بوو بە مەركەزی دەسەڵاتی وەزیر و پارێزگاكان كەمدەبێتەوە، لەم چوارچێوەیەدا دەسەڵاتی ئێمە وەكو پێویست نابێت، ئەوەی كە ئەنجومەنی پارێزگاكانی بەستووەتەوە بە وەزارەتی ناوخۆوە، یەكەم تائێستا ئەنجومەنی پارێزگاكان یەكەی ژمێریاریی سەبەخۆیان نییە بۆ ئەوەی لەم رووەوە پەیوەندییان بە وەزارەتی ناوخۆوە نەبێت، دووەم ئەنجومەنەكان هەیكەلی رێكخستنی ئیدارییان نییە، ئەو كارمەند و فەرمانبەرانەی لای ئێمە دەوام دەكەن هی وەزارەتەكانی ترن.

دواڕۆژ: دەزانیت داهاتی پارێزگای سلێمانی چەندە و چی لێدەكرێت؟ بۆچی ناهێنرێتە ئەنجومەن؟
ئازاد محەمەد
: داهاتی سووتەمەتی دەگەڕێتەوە بۆ وەزارەتی سامانە سروشتییەكان بەبێ ئەوەی بێتە ئەنجومەن، داهاتەكانی تری ناوخۆ راستەوخۆ دەگەڕێنەوە بۆ وەزارەتی دارایی، بەڵام پارەكە لە بانكەكانی پارێزگای سلێمانی دادەنرێت و تەنیا بە ژمارە دەنێردرێتەوە بۆ وەزارەت، بەڕەزامەندیی ئەوانیش خەرج دەكرێت.

دواڕۆژ: ئەو بڕیارانەی ئەنجومەن دەریدەكات و بە نووسراو ئاراستەی لایەنە پەیوەندیدارەكانی دەكەن، دواتر بۆچی بەدواداچوون بۆ ئەوە ناكرێت كە جێبەجێ دەكرێن یان نا؟ 
ئازاد محەمەد: یەكێك لە كێشەكان ئەوەیە ئەو بڕیارانەی كە حكومەتی هەرێم دەریان دەكات بەشێكی زۆریان ناگەڕێنەوە بۆ پەرلەمان، بەشێكی تری پەیوەندیی بە پارێزگاكانەوە هەیە كە حكومەت راوێژیان لەگەڵ ناكات، ئەنجومەنی وەزیران یان وەزارەتەكان راستەوخۆ بڕیارەكانی خۆیان دەردەكەن و لەگەڵ ئێمەدا تووشی پێكدادان دەبن، دواتر ئێمە بڕیارەكانی ئەوان رەتدەكەینەوە، بەدواداچونمان بۆ بڕیارەكانمان كردووە بەڵام فەرمانگە حكومییەكان هۆكاری خۆیان پێوتووین كە جێگەی بڕوای ئێمە نییە.

دواڕۆژ: پێتوایە حكومەتی هەرێم بە یەك چاو سەیری پارێزگاكان دەكات، یان جیاوازیی دەكات؟
ئازاد محەمەد
:  یەكێك لە جیاوازییەكان كە دەكرێت ئەوەیە، لە هەولێر سەردانی شەقامی 120 مەتریمان كرد و پێمان جوان بوو،  هاوكات تێچوویەكی زۆری هەیە، بەڵام ئەو بودجەیە لە سلێمانی نییە، كۆمپانیاكە دەڵێت بە قەرز جێبەجێمان كردووە.

دواڕۆژ: بەڵام بەپێی زانیارییەكان بەرامبەر بە پێدانی نەوت بە نرخی نیوە، ئەو پرۆژەیەی جێبەجێ كردووە، كەواتە ئێوەش بۆ بەرامبەر بە نەوت شەقامی سەد مەتری سلێمانی تەواو ناكەن؟
ئازاد محەمەد: ئێمەش داوای تەواوكردنی شەقامی سەد مەتریمان كردووە، لەهەمانكاتدا وەڵامی كۆمپانیاكەی هەولێر جێگەی بڕوا نییە.

دواڕۆژ: پێش ئەوەی بێیتە ئەنجومەن خاوەنی چی بوویت و ئێستا كە لە كۆتایی كارەكەتدایت خاوەنی چیت؟
ئازاد محەمەد: هەموومان كە هاتینە ئەنجومەن سەروەت و سامانی خۆمان بۆ دەستەی دەستپاكی ئاشكرا كرد، بۆ یەك هەزار دینار هەنگاوی هەڵەمان نەناوە، دواتریش خانەنشین دەبین یان دەچینەوە سەر كارەكانی خۆمان. وەك سەرۆكی ئەنجومەن لە دوای 20 ساڵی تریش ئامادەم بۆ لێپرسینەوە ئەگەر سەروەت و سامانەكەم زیادی كردبێت لەم چوار ساڵەدا، ئەوەی كە هەم بووە كەمی كردووە نەك زیاد.



created by Avesta Group and powered by Microsoft Azure