فاینانشاڵ تایمز: کرێکارە بیانیەکان سعودیە جێدێڵن

هەواڵ / ئابوری :: 12/07/2018‌ :: 241‌ جار بینراوە

دواڕۆژ
رۆژنامەی (فاینانشاڵ تایمز)ی بریتانی ووتارێکی (ئەحمەد عەمران)ی لەژێر ناونیشانی "بیانیەکان بە رێژەیەکی بێوێنە سعودیە جێدێڵن" بڵاوکردۆتەوە و تیایدا دەڵێت، کرێکارە بیانیەکان لەگەڵ سەپاندنی باجی زیاتردا بە ژمارەی زۆر سعودیە جێدێڵن.


عمران ئاماژەی بۆ ئەوەکردووە، بەگوێرەی داتا رەسمیەکان لە سەرەتای ٢٠١٧ەوە زیاتر لە ٦٦٧ هەزار کرێکاری بیانی سعودیەیان جێهێشتووە کە ئەوەش گەورەترین جێهێشتنە لە مێژوی شانشینەکەدا.

عمران دەڵێت، لە ماوەی ٢٠ ساڵی رابردوودا کرێکارە بیانیەکان رۆڵێکی گرنگیان گێڕا لە ئابوری سعودیە و، نزیکەی یەک لەسەر سێی دانیشتوانی سعودیە و زیاتر ٨٠%ی دەستی کار لە کەرتی تایبەتی ئەو وڵاتە پێکدێنن. 

نوسەر ئاماژە بۆ ئەوەشدەکات، لە چوارچێوەی هەوڵەکانی محەمەد بن سەلمان، شازادەی جێنشین بۆ چاکسازی ئابوری بەنیازە ژمارەی کرێکارە بیانیەکان کەمبکاتەوە تا بوار لە بەردەم کرێکاری ناوخۆ بڕەخسێنێت له‌كاتێكدا رێژەی بێکاری لە وڵاتە ١٢،٩ یە و، بن سەلمان بەنیازە تا ساڵى ٢٠٢٠ ئەو رێژەیە کەمبکاتەوە بۆ ٩%.

بەگوێرەی روپێوێکیش کە لەناو بازاڕی کاری سعودیە ئەنجامدراوە دەرکەوتوە سەرباری ئەو رێژە زۆرەی بێکاری سعودیەکان ئەو پۆستانە پڕناکەنەوە کە کرێکارە بیانیەکان بە بەتاڵی جێیانهێشتووە. 

وەرگێڕانی: کامەران ئەحمەد



created by Avesta Group and powered by Microsoft Azure