دهۆك: چاپكرنا پرتووكان به‌ره‌ڤ زێده‌بوونێ چۆیه‌

هەواڵ / که‌لتور :: 08/07/2018‌ :: 293‌ جار بینراوە

دواڕۆژ، بورهان یه‌حیا
رێڤه‌به‌رێ پرتووكخانه‌یان ل پارێزگه‌ها دهۆك خویاكر، پرۆسه‌یا چاپكرنا پرتووكان به‌راورد ب سالا چۆیى، زێده‌ بوویه‌ و ل 6مه‌هێن ده‌ستپێكێ یێن ئه‌ڤ ساله‌ پترى 230 ژماره‌یێن سپاردنێ بۆ چاپكرنا پرتووكان هاتینه‌ دان.


ئیسماعیل تاهر، رێڤه‌به‌رێ پرتووكخانه‌یان ل پارێزگه‌ها دهۆك بۆ دواڕۆژ رۆهنكر "دگه‌ل باشتربوونا ره‌وشا ئابوورییا وه‌لاتییان و پێدانا مووچه‌ى ئێدى كه‌رتێ تایبه‌ت و دگه‌ل هندێ نڤیسه‌ر ب خۆ ده‌ست ب چاپكرنا پرتووكان كرینه‌ و ل شه‌ش مه‌هێن ده‌ستپێكێ یێن ئه‌ڤ ساله‌ پترى 230 ژماره‌یێن سپاردنێ بۆ چاپكرنا پرتووكان هاتینه‌ دان و ل سالا چۆیى هه‌تا مه‌ها 12ێ 251 ژماره‌ سپاردن هاتبوونه‌دان، لڤێره‌ دیار دبیت پرۆسه‌یا چاپێ هه‌تا نوكه‌ دووجاركرى زێده‌ بوویه‌".

هروه‌ها گۆت "پترییا جاران پرتووكخانه‌یێن كه‌رتێ تایبه‌ت و نڤیسه‌ر ب خۆ ب كارێ پاچكرنا پرتووكان رادبن و لایه‌نێن لناڤ حوكمه‌تێ وه‌كو (چاپ و به‌لاڤكرن، سپیرێز، ئێكه‌تییا نڤیسه‌ران، زانكۆیا دهۆك) ژبه‌ر نه‌بوونا بودجه‌یا پێدڤى پرۆسه‌یا چاپكرنێ لجه‌م وان راوه‌ستیایه‌". 

دیاركر "ئه‌رزانبوونا بهایێ چاپكرنا پرتووكان لجه‌م چاپخانه‌یان ژى رۆلێ خۆ د بلندبوونا رێژه‌یا چاپێ دا هه‌بوویه‌، بۆ نموونه‌ پێشتر ئه‌گه‌ر 500 دانه‌یێن پرتووكه‌كێ ب هزار دۆلاران هاتبا چاپكرن نوكه‌ بهایێ وێ بوویه‌ 400 دۆلار و ئه‌ڤه‌ ‌ بۆ چاپكرنا پرتووكان پالده‌ره‌كه."

ئاماژه‌كر "پترییا وان پرتووكێن دهێنه‌ چاپكرن ئه‌ڤه‌نه‌ (بیرهاتن، مێژوو، ئه‌ده‌ب، ره‌وشه‌نبیری، شعر، په‌ره‌پێدانا مرۆڤایه‌تى) چونكو بازاڕێ فرۆتنا وان لناڤ پرتووكخانه‌یان هه‌یه‌ و پتر خه‌لك دكڕیت له‌وا داكو پرتووكخانه‌ مفادار بن نه‌چارن وى جۆره‌ پرتووكێ چاپ بكه‌ن كو ب باشى بهێته‌ فرۆتن و ب ڤى ره‌نگى پرۆسه‌یا چاپكرنێ ژى دێ به‌رده‌وام بیت".



created by Avesta Group and powered by Microsoft Azure

بەپەلە