دوایین زانیاری لەبارەی ئەژماردنەوەی دەستی دەنگەکانی کەرکوک

هەواڵ / کوردستان :: 07/07/2018‌ :: 1399‌ جار بینراوە

دواڕۆژ، عیماد جەباری
بەرپرسێکی مەڵبەندی کەرکوکی یەکێتی ئاشکرایکرد کە ئەژماری دەنگەکان تاوەکو ئێستا گۆڕانکاری لەژمارەی کورسی هیچ لایەنێک نەکردووە، تورکمان و عەرەبیش داوای ئەژماری دەستی بۆ هەموو سندوقەکانی کەرکوک دەکەن.

شەمسەدین مەحمود بەرپرسی بەشی هەڵبژاردنی مەڵبەندی کەرکوکی یەکێتی نیشتیمانی کوردستان ئەمشەو شەممە 7ی تەمووز بەدواڕۆژی وت "زیاتر لە 520 سندوق ئەژماری دەستی دەنگەکانی بۆ ئەنجامدراوە، بەوەش جیاکردنەوەی دەنگەکان لەکەرکوک کۆتاییهات".

وتیشی "بەپێی ئەو زانیارییانەی لەچاودێرەکانمانەوە دەستمان کەوتووە تاوەکو ئەم ساتە دەنگەکانی یەکێتی هیچ مەترسیەکی لەسەر نییە گۆڕانکاری لەدەنگەکاندا نەگەیشتوەتە ئاستئ گۆڕانکاری لەئەنجام و کورسیدا، بۆیە چاوەڕوان دەکرێت کورسی لایەنەکان هیچ گۆڕانکاریەکی بەسەردا نەیه‌ت".

ئەو بەرپرسەی یەکێتی سەبارەت بەداوای حزبە عەرەب و تورکمان بۆ ئەژمارکردنەوەی دەستی بۆ سەرجەم سندوقەکانی کەرکوک، وتی "ئەو حزبانەی لایەنگرەکانیان بۆ ماوەی 27 رۆژ لەشەقام هێشتنەوەو باسی ساختەکاری بۆ دەکردن، ئێستا کە بۆی رونبووەتە کە ئەنجامەکە لەبەرژەوەندی ئەوان نییە، بۆیە ناچارن بۆ خۆدەربازکردن لەبەرپرسیارێتی لەنێو لایەنگرانی خۆیاندا، جارێکیتر پەڵپی بابەتێکی تر بگرنەوە".

ئاماژەی بۆ ئەوەشکرد کە لایەن دادوەرانی راسپێردراەوەوە بڕیاری دانانی شریتی سور لەسەر سندوقەکانی حەویجە هەموارکراوەتەوەو بەشێکی ژمێردراونەتەوەو بەرێخراون.

ئەمڕۆ پەرلەمانتارانی عەرەب و تورکمانی خولی پێشووی پەرلەمانی عێراق لەبەیاننامەیەکدا داوایانکرد ئەژماری دەستیی سەرجەم سندوقەکانی کەرکوک بگرێتەوە.

هاوکات بەرەی نیشتمانی بۆ رزگارکردنی کەرکوک داوایکرد دادوەرانی راسپێردراو بریاربدەن لەبارەی ئەژمارکردنەوەی تەواوی سندوقەکانی شارەکە بەتایبەت کە ئێستا بۆیان دەرکەوتووە ساختەکاریی کراوە، هۆشداریشیدا کە ئەگەر داواکارییەکەیان رەچاو نەکرێت مانگرتن و خۆپیشاندان دەکەن.



created by Avesta Group and powered by Microsoft Azure