ترەمپ بەئاسمانی لەندەن-دا دەفڕێت!

هەواڵ / جیهان :: 07/07/2018‌ :: 368‌ جار بینراوە

تاگ :: جیهان

دواڕۆژ
بڕیارە رۆژی هەینیی داهاتوو 13ی ئەم مانگە، دۆناڵد ترەمپ سەرۆكی ویلایەتە یەكگرتووەكان سەردانی لەندەن بكات و لەگەڵ تێریزا مەی سەرەك وەزیرانی بریتانیا كۆببێتەوە. بەڵام پێش ئەو كۆبوونەوە گرنگە دەزگاكانی راگەیاندن هەواڵێكی دیكەی سەیر و سەمەرەیان بڵاوكردووەتەوە.

هەواڵە سەیرەكە، وەك بی بی سی دەڵێت لەو رۆژەدا كە ترەمپ لەگەڵ مەی كۆدەبێتەوە، باڵۆنێك بە ئاسمانی لەندەن-ی پایتەختی بریتانیادا هەڵدەدرێت كە لە شێوەی ترەمپ-دا دروستكراوە بەڵام بە ساوایی!! و ناویشنراوە (ترەمپی ساوا) و بڕی 18 هەزار جونەیی ئیسترلینی تێچووە.

سادق خان، عومدەی لەندەن رەزامەندیی لەسەر هەڵدانی باڵۆنەكە بە ئاسمانی پایتەختدا دەربڕیوە و دەڵێت بەشێكە لە ناڕەزایی دەربڕینێكی ئاشتیانە كە رەنگە شێوە و شێوازی دیكەی جیاجیایش وەربگرێت.

وێڕای رەزامەندیی عومدەی شارەكە، بەڵام هەڵدانی باڵۆنەكە و فڕینی (ترەمپی ساوا) بە ئاسمانی لەندەن-دا گرفتی دیكەی لەڕێگەدایە، ئەویش ئەوەیە كە زیاتر لە 10 هەزار كەس داوایانكردووە باڵۆنەكە لە باخچەی گۆڕەپانی پەرلەمانی بریتانیاوە بەرەڵای ئاسمان بكرێت، كێشەكەیش ئەوەیە كە ئەو سنوورە ئاسمانییە دەكەوێتە كایەی قەدەغەكردنی فڕینی فڕۆكە و هەر (تەن)ێكی ترەوە، بۆیە پێویستی بە رەزامەندیی بەڕێوەبەرایەتی پۆلیسی لەندەن و كۆمپانیای نیشتمانیی خزمەتگوزارییەكانی گەشتە ئاسمانیەكان (ناتس)یشە. ئێستا چالاكوانان سەرقاڵی وەرگرتنی رەزامەندیی ئەو دوو لایەنەیشن كە ئاماژەكان روو لەوەن ئەوانیش رازیی بن.



created by Avesta Group and powered by Microsoft Azure