رێكخراوى لێبوردنى نێوده‌وڵه‌تى هەڵمەتێکی نوێ بۆ راگرتنی لەسێدارەدانی رامین پەناهی دەستپێدەکات

هەواڵ / کوردستان :: 28/06/2018‌ :: 614‌ جار بینراوە

دواڕۆژ 
لەپێناو رێگرتن له‌ لەسێدارەدانی رامین پەناهی، چالاکوانی کورد له‌ ئێران رێکخراوی لێبوردنی نێودەوڵەتی (ئامنێستی ئینتەرناشناڵ) هەڵمەتێکی نوێی دەستپێکرد.


هەرچەندە بڕیاربوو لە ١٥ی حوزەیران و دوای جەژنی رەمەزان رامین حسێن پەناهی، چالاکوانی کورد لەسێدارەبدرێت، بەڵام بەهۆی ناڕەزایەتیەکانەوە جێبەجێکردنی سزاکە دواخرا و لێپرسراوانی ئێرانیش هیچ زانیارییەک لەبارەی ئەنجامدانی لەسێدارەدانەكەوە راناگەیەنن و چاوەڕێ دەکرێت لەهەر کات و ساتێکدا بێت جێبەجێ بکرێت.

بەمەبەستی راگرتنی جێبەجێکردنی ئەو سزای مەرگە رێکخراوی لێبوردنی نێودەوڵەتی هەڵمەتێکی دەستپێکردوە و تائێستاش ئەوانەی بەشداری هەڵمەتی ئیمزا کۆکردنەوەیان کردوە بۆ راگرتنی سزاکە ژمارەیان گەیشتۆتە ١٨ هەزار کەس.

لە دەقی هەڵمەتەکەدا ئاماژە بۆ ئەوە کراوە دادگایی کردنەکە و سزاکەی رامین رەوا و دادپەروەرانە نیە و پێویستە بڕیارەکە و سزاکە هەڵبوەشێندرێنەوە.

سیاسەتمەداران و رۆژنامەنوسان و روناکبیران پشتیوانیان لە هەڵمەتەکەی رێکخراوی لێبوردنی نێودەوڵەتی کردوە.

رامین حسێن پەناهی له‌ 21ی حوزەیرانی 2017 لەلایەن هێزە ئیتلاعاتییەکانەوە لەکاتێکدا بەهۆی تەقەی راستەوخۆی ئەو هێزانە بریندارببوو دەستبەسەر و گوازرابووەوە بۆ ئیدارەی ئیتلاعات و لە رێکەوتی 25ى شوبات-ی ئەمساڵ، لەدادگایەکی چەند خولەکیدا لەلایەن دادگای شۆڕشی ئێران لە سنە بەتۆمەتی (یاخیبوون دژ بە دەسەڵات) سزای لەسێدارەدانیی بەسەردا سەپێنراوە.

وەرگێڕانی: کامەران ئەحمەد



  • ڕۆژ
  • هەفتە
  • مانگ
created by Avesta Group and powered by Microsoft Azure