سەرجەم بەركەوتوانی چەكی كیمیایی پشكنیان بۆ دەكرێتەوە

هەواڵ / کوردستان :: 27/06/2018‌ :: 714‌ جار بینراوە

دواڕۆژ، عەلی حەمە سەعید
بەفەرمانی وەزارەتی تەندروستی پێداچوونەوە بە ڕێژەی بەركەوتەیی سەرجەم ئەو كەسانەدا دەكرێت كە وەك برینداری چەكی كییمیایی تۆماركراون.


كامەران مستەفا، بەڕێوەبەری گشتی كاروباری شەهیدان و ئەنفالكراوانی هەڵەبجە بە دواڕۆژی ڕاگەیاند "بەمەبەستی دەستخستنی ئامارێكی ڕوون و نەهێشتنی گلەیی و گازندە لەسەر لیستی بەركەوتووانی چەكی كیمیایی، بە بڕیارێكی وەزارەتی تەندروستی بە هەماهەنگی لەگەڵ وەزارەتی كاروباری شەهیدان، دوو لیژنە كە هەر لیژنەیەكیان لە سێ‌ پزیشكی پسپۆڕی سنگ و چاو و قورگ پێكهاتووە، پێداچوونەوە بەڕێژەی برینداریی سەرجەم بەركەوتووانی چەكی كیمیایی لە كوردستان دەكەنەوە".

ئاماژەی بەوەشكرد، ئەو دوو لیژنەیە یەكێكیان لەشاری هەولێر و ئەویتریشیان لەشاری سلێمانی دادەنیشن، بەڵام بەڕێوەبەرایەتی گشتی تەندروستی هەڵەبجە لە هەوڵدایە بۆ ئەوەی لیژنەكەی سلێمانی بهێنێتە هەڵەبجە بەو پێیەی زۆرترین بەركەوتەی چەكی كیمیایی لە هەڵەبجەدایە، بۆیە لە چەند ڕۆژی داهاتوودا هەردوو لیژنەكە دەست بەكارەكانیان دەكەن.

بەڕێوەبەری گشتی كاروباری شەهیدان و ئەنفالكراوانی هەڵەبجە ئەوەشی ڕوونكردەوە، كاری ئەو دوو لیژنەیە تەنها پێداچوونەوە نییە بە ڕێژەی برینداری ئەو بەركەوتووانەی كە ئێستا موچە وەردەگرن، بەڵكوو ئەو كەسانەش تۆماردەكەن كە بەركەوتەی چەكی كیمیایین، بەڵام تا ئێستا بەهەر هۆكارێك بێت ناویان تۆمار نەكراوە.

كارمەران مستەفا ئەوەشی وت: ئەو كەسانەی كە لیژنە تەندروستییەكە بڕیاریان لێدەدات وەك بەركەتووی چەكی كیمیایی، ئەوا موچەكانیان بەردەوام دەبێت و ئەوانەشی كە تا ئێستا ناویان تۆمارنەكراوە، بەڵام بەركەوتووی چەكی كیمیایین، دوای بڕیاری لیژنەكە ئەوانیش موچەیان بۆ دەبڕردرێتەوە كە بۆ هەر مانگێك بڕی 400 هەزار دینارە.

لەئێستادا تەنها لە سنوری پارێزگای هەڵەبجە ئەو كەسانەی كە وەك بەركەوتووی چەكی كیمیایی موچە وەردەگرن ژمارەیان 400 بەركەوتەیە، بەڵام ئەو كەسانەی كە دوو بارە پشكنینیان بۆ دەكرێتەوە، ژمارەیان دەگاتە هەزار بەركەوتووی چەكی كیمیایی.



created by Avesta Group and powered by Microsoft Azure

بەپەلە