بەڕێگەیەكی نوێ‌ منداڵە ونبووەكانی هەڵەبجە دەدۆزرێنەوە

هەواڵ / کوردستان :: 24/06/2018‌ :: 473‌ جار بینراوە

دواڕۆژ، عەلی حەمە سەعید
ئیدارەی پارێزگای هەڵەبجە بڕیاریداوە نمونەی پشكنین وەربگرن و ڕەوانەی سەنتەری (كینگ كۆلێج)ی بریتانی دەكەن بۆ یەكلاكردنەوەی دۆسیەی منداڵە ونبووەكان.

 
عەلی عوسمان، پارێزگاری هەڵەبجە بەدواڕۆژی ڕاگەیاند "بەمەبەستی یەكلاكردنەوەی دۆسیەی منداڵە دۆزراوەكانی هەڵەبجە لە هەنگاوێكی نوێدا و لەڕێگەی دادگای هەڵەبجەوە پڕۆفایلی 75 خێزان ئەوانەی منداڵیان ونبووە تەواو كراوە، نمونەی خوێنیان لێوەردەگیرێت و ڕەوانەی سەنتەری (كینگ كۆلێج)ی بریتانی دەكەین بۆ یەكلاكردنەوەی دۆسیەكانیان".
 
ئاماژەی بەوەشكرد، ئەو منداڵانەی ئێستا دۆزراونەتەوە و بانگەشەی ئەوە دەكەن كە یەكێكن لە منداڵە ونبووەكانی هەڵەبجە، بە هەمان شێوە زانیاری تەواو لەوانیش وەردەگرین ڕەوانەی هەمان سەنتەری دەكەین.

 

بەوتەی پارێزگاری هەڵەبجە، هاوكات (قوباد تاڵەبانی) جێگری سەرۆكی حكومەت بەڵێنی داوە تێچووی یەكلاكردنەوەی دۆسییەكان لە ئەستۆبگرێت، بۆ ئەو مەبەستەش لەئێستادا نمونەی خوێن لەخاوەنی سەرجەم كەیسەكان وەرگیراوە و سەرجەم كارەكانیش لەڕێگەی دادگاوە ئەنجامدراوە، بۆ ئەوەی ئەو هەڵانەی پێشوو ڕوویاندا دووبارە نەبنەوە.
 
پارێزگاری هەڵەبجە ئەوەشی خستەڕوو، دوابەدوای یەكلاكردنەوەی دۆسیەكان لە سەنتەری كینگ كۆلێج دواتر ئەنجامی پشكنینەكان لەنامەی داخراودا لەبریتانیاوە دەگەڕێتەوە بۆ دادگای باری كەسێتی هەڵەبجە و تەنها ئەوان دەتوانن نامەكان بكەنەوە و ئەنجامەكان رابگەیەنن.
 
لەلایەكی ترەوە مریەم باروتجیان، یەكێك لە منداڵە دۆزراوەكانی هەڵەبجە ئەوەی بەدواڕۆژ ڕاگەیاند "كە لەسەر داوای سەرۆكی حكومەتی هەرێم ناسنامەیەكی نوێم بۆ دەردەهێنرێت بە جۆرێك لەسەر ناسنامەكە ناوم (ژیان كامەران)ە و ناسناوی هەورامیش لەسەر ناسنامەكەم دەنوسرێت تا ئەوكاتەی بەیەكجاری دۆسیەكەم یەكلایی دەكرێتەوە.



created by Avesta Group and powered by Microsoft Azure