کونسڵخانەی ئێران کاتی یەکەم گەشتی ئاسمانی نێوان سلێمانی و تارانی راگەیاند

هەواڵ / کوردستان :: 07/06/2018‌ :: 845‌ جار بینراوە

دواڕۆژ، هانا چۆمانی
کونسڵخانەی ئێران لە هەولێر رایدەگەیەنێت، رۆژی یەکشەممە ١٠ حوزەیرانی ٢٠١٨ دوای نزیکەی نۆ مانگ یەکەم گەشتی ئاسمانی لە فڕۆکەخانەی نێودەوڵەتی سلێمانیەوە بۆ تاراندا ئەنجامدەدرێت.


لە راگەیاندراوەکەی کونسڵخانەی ئێران کە دوای نیوەڕۆی ئەمڕۆ پێنجشەممە ٧ی حوزەیرانی ٢٠١٨ بڵاوکراوەتەوە، تیایدا هاتوو "هەفتەی داهاتوو بەفەرمی گەشتە ئاسمانییەکانی نێوان سلێمانی و تاران دەستپیدەکەنەوەو یەکەم گەشتیش لە رۆژی یەکشەممە دەبێت راستەوخۆ لەنێوان ئەو دوو شارەدا".

لەراگەیاندراوەکەدا ئه‌وه‌ش هاتووە "دوای نزیکەی نۆ مانگ لە وەستانی گەشتە ئاسمانییەکانی نێوان کۆماری ئیسلامی ئێران و هەرێمی کوردستان، ئێستا رێککارە یاساییەکان تەواوبوون، رۆژی یەکشەمە ١٠ حوزەیرانی ٢٠١٨ بەفەرمی گەشتەکان دەستپێدەکەنەوە ".

رۆژی ٢٧ ئەیلولی ٢٠١٨ بەهۆی ئەنجامدانی ریفراندۆمی کوردستان سەرۆک وەزیرانی عێراق گەمارۆی فڕینی خستەسەر گەشتە ئاسمانییەکانی هەرێمی کوردستان و نزیکەی شه‌ش مانگ رێگە نەدرا هیچ گەشتێکی ئاسمانیی لە فڕۆکەخانەکانی هەرێمی کوردستانه‌وه‌ ئەنجامبدرێت، تائێستاش بەشێک لە وڵاتان گەشتەکانیان بۆ هەرێمی کوردستان دەستپێنەکردووه‌تەوە.



created by Avesta Group and powered by Microsoft Azure