"نزمبوونا بهایێ تیمه‌نێ ئیرانى زیان گه‌هاندییه‌ بازرگانێن هه‌رێمێ"

هەواڵ / ئابوری :: 04/06/2018‌ :: 1429‌ جار بینراوە

دواڕۆژ، بورهان یه‌حیا
سه‌رۆكێ ژۆرا بازرگانى و پیشه‌سازییا دهۆك راگه‌هاند "نزمبوونا بهایێ تیمه‌نێ ئیرانى هه‌مبه‌ر دۆلارى وه‌كرییه‌ كێمتر كه‌رسته‌ و ژ هه‌رێمێ بۆ ئیرانێ بچن و زیان ب بازرگانێ هه‌رێمێ كه‌ڤتییه‌".


ئه‌یاد حه‌سه‌ن، سه‌رۆكێ ژۆرا بازرگانى و پیشه‌سازییا دهۆك بۆ دواڕۆژ رۆهنكر" ب ده‌هان كه‌رسته‌یێن كاره‌بایى و یێن ئاڤاكرنێ و به‌رهه‌مێن سۆته‌مه‌نیێ ژ هه‌رێمێ بۆ ئیرانێ دچن و نزمبوونا بهایێ تیمه‌نى هه‌مبه‌ر دۆلارى وه‌كرییه‌ وه‌لاتیێن ئیرانێ كێمتر داخوازا كه‌رسته‌یان بكه‌ن و ب ڤى ره‌نگى رێژه‌یا هنارتنا وان به‌رهه‌مان بۆ ئیرانێ كێم بوویه‌ و ئێكسه‌ر زیان گه‌هاندییه‌ بازرگانێن هه‌رێمێ یێن كو سه‌ره‌ده‌ریێ دگه‌ل ئیرانێ دكه‌ن".

خویاكر" ل وه‌لاتێ توركیا ژى لیره‌ نزمبوونه‌كا به‌رچاڤ هه‌مبه‌ر دۆلارێ ئه‌مریكى دیتییه‌ و به‌رده‌وام بوونا ڤێ چه‌ندێ دێ بیته‌ ئه‌گه‌رێ دائێخستنا ب ده‌هان كارگه‌هێن مه‌زن و بچووك ل وێرێ، لێ كۆمپانیێن هه‌رێمێ دشێن ژ كۆمپانیێن دى یێن توركى كه‌رسته‌یان بكڕن و زیان ب وان ناگه‌هیت چونكو توركیا وه‌لاته‌كێ پیشه‌سازییه‌ و ب هزاران كارگه‌هێن ئێك جۆر هه‌نه‌".

ئاماژه‌كر "بازرگانێن هه‌رێمێ هه‌ر ل ده‌ستپێكێ هزر ل ڤێ كێشه‌یێ كرییه‌ و هه‌موو ئالۆگۆڕیێن وان یێن بازرگانى ب دۆلارینه‌ و گرێبه‌ستێن وان ژى هه‌موو ب دۆلارینه‌ ئانكو ب نزمبوون یان گرانبوونا بهایێ لیره‌ى زیان ب وان ناگه‌هیت و لناڤخۆیا هه‌رێمێ و ئیراقێ ژى بهایێ دۆلارى لسه‌ر 1.20 جێگیر بوویه‌ و ئه‌ڤه‌ هێمایه‌كێ باشه‌".

ل مه‌هێن بۆرى ل هه‌ر دوو وه‌لاتێن ئیران و توركیا بهایێ تیمه‌ن و لیره‌ى به‌راورد دگه‌ل دۆلارى نزمبوونه‌كا به‌رچاڤ بخۆڤه‌ دیتییه‌ و نه‌سه‌قامگیرى لناڤ بازاڕێ وان یێ ناڤخۆ چێكرییه‌.



created by Avesta Group and powered by Microsoft Azure